Aktrısa qaza tapqan jol apaty: Gelandewagen júrgizýshisine qatysty sot bastaldy
ALMATY. QazAqparat - Almaly aýdandyq qylmystyq ister boıynsha sotta Abaı men Seıfýllın kóshesi qıylysynda úsh adamdy mert qylǵan jol apatyna qatysty sot bastaldy, dep habarlaıdy QazAqparat tilshisi sot zalynan.
Gelandewagen ıesi 34 jastaǵy Ilıas Kar sot aldynda jaýap berip jatyr. Kúdikti jol erejesin buzǵany úshin, úsh adamnan asa adamdy mert qylǵan jol apatyna sebepker bolǵany úshin jaýapqa tartylýda. Sot otyrysyna marqum aktrısa Sholpan Elgezekovanyń anasy men týystary, áriptesteri qatysty.
Aıta ketý kerek, qaıǵyly oqıǵa 29 jeltoqsanda bolǵan edi. Abaı men Seıfýllın kósheleriniń qıylysynda Mersedes Gelandewagen jáne Mitsubishi Galant kólikteri soqtyǵysqan bolatyn. Mersedes Gelandewagen kóligi baǵdarshamnyń qyzyl túsine ótip ketken. Jol apatynan 3 adam - Mitsubishi Galant júrgizýshisi men eki jolaýshy kóz jumdy.
Olardyń arasynda belgili aktrısa Sholpan Elgezek bar. Keıin belgili bolǵandaı, 34 jastaǵy Gelandewagen júrgizýshisi kóligin mas kúıinde júrgizgen.
«Mercedes Gelandewagen» markaly avtomobıl júrgizýshisi, 1985 jyly týǵan Kar Іlııas Abaı jáne Seıfýllın dańǵyldarynyń qıylysynda jol apatyn jasaǵandyqtan, QR Qylmystyq-protsesýaldyq kodeksiniń 128-babyna sáıkes ustaldy. Sotqa deıingi tergep-tekserý Qylmystyq kodekstiń 345-babyna jáne 347-babynyń 3-bóligine sáıkes júrgizildi.
Aıta keteıik, atalǵan jol apatynan aman qalǵan jalǵyz jolaýshy - aktrısa Aızada Satybaldıeva qabyrǵalary synyp, aýyr halde aýrýhanaǵa túsken bolatyn. Eki aptadan soń aktrısanyń beti beri qarap, úıine shyǵaryldy.
