Aktrısa qaza tapqan jol apaty: Gelandewagen júrgizýshisi jazasyn jeńildetýdi surady
ALMATY. QazAqparat - Almaty qalalyq sotynyń apellıatsııa alqasynda 3 adamnyń ómirin qıǵan jol apatyna sebepker bolǵan Gelandewagen júrgizýshisi Іlııas Kardyń shaǵymy qaraldy, dep habarlaıdy QazAqparat tilshisi.
Sottalýshy sýdıadan sot úkimin jeńildetýdi surady. Onyń qorǵaýshysy «jol apatyna mas kúıinde tústi» degen aıypty alyp tastaýyn ári qamaýdan bosatýyn ótingen bolatyn.
Sonymen qatar, Іlııastyń týǵandary jol apatynan kóz jumǵan boıjetken Dınara Hamıtovanyń týǵandaryna moraldyq shyǵyndy óteýge daıyn ekenin aıtty. Al, qaza bolǵan qyzdyń týystarynyń aıtýynsha, Іlııastyń týǵandary olardan qylmyskerdi sottatpaıtyny týraly qolhat suraǵan.
Apellıatsııalyq sot alqasy aldyńǵy sot úkimin ózgerissiz qaldyrdy.
Eske salaıyq, jol-kólik oqıǵasy byltyr 29 jeltoqsanda bolǵan edi. Abaı jáne Seıfýllın kósheleriniń qıylysynda Mersedes Gelandewagen men Mitsubishi Galant kólikteri soqtyǵysqan. Birinshi kólik baǵdarshamnyń qyzyl túsine ótip ketken. Jol apatynan 3 adam - Mitsubishi Galant júrgizýshisi men eki jolaýshy kóz jumdy. Olardyń arasynda belgili aktrısa Sholpan Elgezek bar. Keıin belgili bolǵandaı, 34 jastaǵy Gelandewagen júrgizýshisi kóligin mas kúıinde júrgizgen.
Aıta keteıik, atalǵan jol apatynan aman qalǵan jalǵyz jolaýshy - aktrısa Aızada Satybaldıeva qabyrǵalary synyp, aýyr halde aýrýhanaǵa túsken bolatyn. Eki aptadan soń aktrısanyń beti beri qarap, úıine shyǵaryldy.
Almaly aýdandyq sotynyń sýdıasy Roman Selıtskıı 34 jastaǵy sottalýshy Іlııas Kardy 10 jylǵa bas bostandyǵynan aıyrý týraly úkim shyǵardy. Sonymen qatar, ol qaza tapqan ár azamattyń otbasyna 3 mln teńgeden ótemaqy tóleýge tıis.
