Aqtoty Raıymqulovaǵa jaraqattanǵan sportshyny saýyqtyrý jobasy tanystyryldy

NUR-SULTAN. QazAqparat - QR Prezıdenti Qasym-Jomart Toqaevtyń «Halyq únine qulaq asatyn memleket» tujyrymdamasyn júzege asyrý aıasynda Mádenıet jáne sport mınıstri Aqtoty Raıymqulova mınıstrlik ǵımaratyndaǵy «Adaldyq alańynda» azamattardy jumys jáne jeke máseleleri boıynsha qabyldady, dep habarlaıdy QazAqparat tilshisi.

Mınıstrlik baspasóz qyzmeti taratqan málimetke qaraǵanda, qabyldaýǵa mınıstrmen qatar azamattardyń suraǵyna jaýap berý úshin vıtse-mınıstrler Eldos Ramazanov pen Nurǵısa Dáýeshov, Til saıasaty komıtetiniń tóraǵasy Ǵalymjan Meldeshov pen Mádenıet jáne óner isteri departamenti dırektorynyń mindetin atqarýshy Ǵanı Muratov pen orynbasary Maqsat Arǵynbekov qatysqan.

Mınıstrmen kezdesýge jazylǵan 10 adamnyń máselesi san alýan.

Ahan Ómirbek prozalyq jáne poezııalyq shyǵarmalar jınaǵynyń 2 tomdyǵyn mınıstrliktiń qoldaýymen 2020 jyly shyǵatyn kitaptar tizimine qosýyn ótindi. Bul másele boıynsha mınıstr Til saıasaty komıtetiniń tóraǵasy Ǵalymjan Meldeshovke tapsyrma berdi.

Mınıstrmen kezdesý barysynda Ámir Qýatov jaraqat alǵan sportshylardy saýyqtyrýǵa arnalǵan jobasy jaıynda tarqatyp aıtty. Aqtoty Rahmetollaqyzy atalǵan joba boıynsha Eldos Ramazanovqa Densaýlyq saqtaý, Bilim jáne ǵylym mınıstrligimen birlese jumys tobyn quryp, máseleni jan-jaqty qarastyrýdy tapsyrdy.

Qazaqstan Respýblıkasynyń Mádenıet jáne sport mınıstri Aqtoty Raıymqulova azamattardy tyńdap bolǵan soń, qabyldaýda aıtylǵan ótinishterdiń eshqaısysy nazardan tys qalmaıtynyn jetkizdi.