Aqtoty Raıymqulova jýrnalısterdi «Altyn Tomırıs» syılyǵymen marapattady

NUR-SULTAN. QazAqparat – Elordada Qazaqstan Respýblıkasynda mádenıet pen ónerdi nasıhattaǵan jýrnalısterge «Altyn Tomırıs» syılyǵyn tapsyrý saltanaty ótti, dep habarlaıdy QazAqparat.

Syılyqty QR Mádenıet jáne sport mınıstrligi men «Astana Opera» teatry taǵaıyndaǵan. «Altyn Tomırıs» alǵash ret tapsyryldy.

QR Mádenıet jáne sport mınıstri Aqtoty Raıymqulova BAQ ókilderine «Altyn Tomırıs» marapattaryn, qurmet gramotalary men «Qazaq operasynyń ańyz adamdary» estelik kitaptaryn tabys etti.

«Altyn Tomırıs» músinshesi «Astana Opera» teatry ǵımaratynyń joǵary jaǵyndaǵy kvadrıga túrinde jasalǵan. Onda kúıme arbanyń tizginin ustaǵan saq patshaıymy Tomırıs beınelengen.

Marapattalǵandar qatarynda «Habar 24», «Qazaq TV», «Qazaqstan», «Abaı TV», «Mır», «Eýrazııa» birinshi arnasy» telearnalary, «Egemen Qazaqstan», «Kazahstanskaıa pravda», «Astana Aqshamy», «Vechernıaıa Astana», «Novoe pokolenıe», «Lıter», «Karavan» gazetteri, Tengrinews.kz, Zakon.kz, «QazAqparat» HAA, Sputnik Kazahstan, Nur.kz, Baigenews.kz aqparat agenttikteriniń tilshileri, sonymen qatar tanymal qazaqstandyq blogerler bar.

Saltanatty rásim aıaqtalǵan soń jýrnalısterdi teatrdyń shyǵarmashylyq ujymy quttyqtap, merekelik kontsert tartý etti. Sahnada opera trýppasynyń solısteri – Qazaqstannyń eńbek sińirgen qaıratkeri Jamılıa Djarkımbaeva, Elena Ganja, Ásem Sembına, Ramzat Balakıshıev, Shyńǵys Rasylhan, «KVIKONTE» úrlemeli aspaptar kvınteti jáne kontsertmeıster Raýshan Beskembırova óner kórsetti.