Aqtoty Raıymqulova: Jańa qoǵam men jańa adamdy qalyptastyrý ıdeıasy da Abaıdan bastalady
Bul týraly Abaıdyń 175 jyldyq mereıtoıynyń resmı ashylýyna arnalǵan saltanatty sharada QR Mádenıet jáne sport mınıstri Aqtoty Raıymqulova aıtty, dep habarlaıdy QazAqparat tilshisi.
«Qasym-Jomart Kemeluly «Abaı – memleket isiniń múddelesi» dep atap ótkendeı, uly oıshyl birligi jarasqan el bolý ıdeıasynyń jaqtaýshysy bola bildi. Ol ultymyzdy ortaq maqsatqa uıystyryp, ádiletti qoǵam qurý ıdeıasyn alǵa tartty. Búgingi «Halyq únine qulaq asatyn memleket» tujyrymdamasy dál osy ustanymmen sabaqtas. Uly Abaı shyǵarmalarynyń ózeginde eldiń qamy, qýanyshy men qaıǵysy, keleshegi, arman-muraty tur. Jańa qoǵam men jańa adamdy qalyptastyrý ıdeıasy da Abaıdan bastalady«, - dedi ol.
Mınıstrdiń aıtýynsha, Abaı eldiń únemi alǵa jyljýyna, ósip-órkendeýine shyn nıetimen tileýles bolyp, halqymyzdy jańa ómirge beıim bolýǵa shaqyrdy.
«Hakim Abaıdyń til úırenýdi jáne jańa kásip ıgerýdi erekshe dáriptegenin jaqsy bilemiz. Uly aqyn: «Teginde adam balasy adam balasynan aqyl, ǵylym, ar, minez degen nárselermen ozbaq» deıdi. Bul – Abaı danalyǵynyń taǵy bir jarqyn dáleli. Ol búkil qazaq jurtyn eńbekke baýlydy. Abaı sanaly ǵumyrynda ultjandylyqtyń, eldikti qadirleýdiń ozyq úlgisin kórsetti«, - dedi Mádenıet mınıstri.
Aqtoty Raıymqulova uly ǵulamanyń murasy jáne ónegeli ómiri – shynaıy otanshyldyqtyń mektebi ekendigin basa aıtty.
»Urpaq tárbıesinde árdaıym Abaıdyń ultyna sińirgen eńbegin dáripteýimiz qajet. Kemeńger oıshyl eldiń damýyn tejeıtin teris ádetterden aýlaq bolýǵa shaqyrdy. Ásirese, maqtan men masyldyq psıhologııadan arylyp, adal eńbek etýge úndedi. Uly oıshyldyń ǵıbratty sózderi táýelsiz Qazaqstannyń jańa serpinmen damýy úshin qajet. Sondyqtan, bul mereıtoıdyń tanymdyq jáne taǵylymdyq mán-mańyzy asa zor«, - dedi ol.
