Aqtoty Raıymqulova UNESCO onlaın-konferentsııasyna qatysty

NUR-SULTAN. QazAqparat - UNESCO-nyń Bas dırektory Odre Azýle álem elderiniń Mádenıet mınıstrlerimen onlaın kezdesý ótkizdi. Onlaın kezdesýge QR Mádenıet jáne sport mınıstri Aqtoty Raıymqulova da qatysty, dep habarlaıdy QazAqparat tilshisi atalǵan vedomstvonyń baspasóz qyzmetine silteme jasap.

Onlaın jıynda sóz alǵan QR Mádenıet jáne sport mınıstri Aqtoty Raıymqulova bul salaǵa kórsetilip jatqan qoldaý, jınaqtalǵan tájirıbe jəne usynystarmen bólisti. Sondaı-aq, koronavırýs indetiniń taralýynyń aldyn alýda qabyldanǵan sharalar jaıly aıtty.

Búgingi tańda barlyq mádenı-buqaralyq jáne sporttyq is-sharalar toqtatyldy. Onyń ishinde tarıhı-mádenı nysandar men UNESCO-nyń dúnıejúzilik murasynyń tizimine kiretin nysandar da jabylǵan.

Qalyptasqan jaǵdaıǵa qaramastan, búkil álem úshin kúrdeli ýaqytta mádenıet jáne óner qaıratkerleri qazaq halqy men sheteldik kórermenderdi onlaın rejımde óz shyǵarmashylyǵymen qýantyp keledi.

Elimizdegi óner salasyndaǵy barlyq uıymdar, murajaılar, kitaphanalar jáne ózge de mádenı-demalys mekemeleri ózderiniń aýdıo-jáne beıne jazbalaryna, vırtýaldy týrlarǵa, jarııalanymdarǵa jáne t.b. tegin onlaın - qoljetimdilik jasady.

Mádenı jáne sporttyq qoǵamdyq mekemelerdiń áleýmettik jelilerinde tanymal mádenıet qaıratkerlerimen onlaın jattyǵýlar, dárister, vebınarlar, kontsertter, vırtýaldy ekskýrsııalar kórsetilip, fılmder men balalarǵa arnalǵan ertegiler oqý kórermenge jol tartty.

Áleýmettik jelilerde únemi ártúrli chellendjder ótkizilip jatyr. Sonymen qatar bul kúnderi sport jáne týrızm salasynda onlaın kezdesýler ótip, pikir almasýlar júrip jatqanyn aıta ketken jón.

Ásirese, elimizde Mádenıet jáne sport mınıstrliginiń bastamasymen júzege asyrylyp jatqan «Karantındegi juldyz» jobasy úlken tanymaldyqqa ıe boldy. Onyń aıasynda tanymal ártister tikeleı efırde óner kórsetip, suhbattasyp, kórermenderdiń suraqtaryna jaýap beredi.

Mádenıet mekemeleri onlaın-konferentsııalar ótkizip keledi. Qazaq halqynyń uly aqyny Abaı Qunanbaevtyń 175 jyldyǵyna jáne ǵalym, fılosof Ábý Nasyr ál-Farabıdiń 1150 jyldyǵyna arnalǵan halyqaralyq forým Qytaı, Túrkııa, Vengrııa jáne Reseı spıkerleriniń qatysýymen uıymdastyryldy.

Mádenıet salasynyń qyzmetkerleri indetpen kúreste áleýmettik kómek te kórsetip keledi.

Mınıstrliktiń bastamasy boıynsha memleket qarjylandyratyn, teatrlar, kınostýdııalar, murajaılar, stadıondar tigin tsehtary bar barlyq mádenıet jáne sport uıymdary medıtsınalyq betperde tigýmen aınalysady. Búginde olar medıtsına jáne áleýmettik qorǵaý mekemelerine 40 myńnan astam medıtsınalyq betperde daıyndap, tabys etti.

Aıta keteıik, onlaın kezdesý jumysyna 136 eldiń mádenıet mınıstri qatysty. Taraptar osynaý kúrdeli kezeńde búkil álemdik tájirıbeni qoldana otyryp, mádenıet pen ónerdi saqtaý men damytýǵa baǵyttalǵan jumystar týraly pikir almasty. Onlaın kezdesýdiń qorytyndy bóliminde halyqaralyq tájirıbege saı, ekonomıkany qoldaý jónindegi jalpy is-sharalarǵa qosymsha mádenıet sektoryn qoldaýǵa arnalǵan naqty is-sharalar qabyldanatyndyǵy aıtyldy. Mádenı baǵyttaǵy jumys COVID-19-dy jeńip shyqqanǵa deıin belsendi túrde jalǵasady.