Aqtoty Raıymqulova Ulttyq qoǵamdyq senim keńesiniń múshelerimen kezdesti
«Osy otyrysty ótkizýdiń birden-bir sebebi – QR Prezıdenti janyndaǵy Ulttyq qoǵamdyq senim keńesi músheleriniń usynystaryn talqylaý. Usynystardy talqylaýdy biz 2019 jyldyń 12 qazanynda bastadyq. Sol otyrystaǵy sizderdiń usynystaryńyzdy eskere otyryp, mınıstrlikke baǵynyshty uıymdar birqatar jumys atqardy. Osy mınıstrlik janyndaǵy Mádenı saıasat jónindegi keńes jáne Rýhanı kóshbasshylar qory qurylyp, búgingi otyrysqa qatysyp otyr. Bul da sizderdiń usynystaryńyz bolatyn», - dedi mınıstr QR Ulttyq kitaphanasynda ótken kezdesýde.
Sonymen birge, A. Raıymqulova Memleket basshysynyń tapsyrmasymen respýblıkalyq mádenıet uıymdary qyzmetkerleriniń laýazymdyq jalaqysy – 50 paıyzǵa, kommýnaldyq, aımaqtyq uıym qyzmetkerleriniń eńbekaqysy – 35 paıyzǵa artqanyn eske saldy.
«Hákim Abaıdyń 175 jyldyǵyna arnalǵan saltanatty ashylý rásimi de ótti. Sonda 83 tarmaqtan turatyn ulttyq jospar bekitildi. Onyń aıasynda 500-den astam ártúrli sharalar ótedi. Munda árıne, Prezıdent ysyrapshyldyqqa, asyǵystyqqa jol bermeı, Abaıdyń aty men murasyn dúnıe júzine kórsetetindeı jaqsy sharalardy ótkizýdi tapsyrdy. Sonymen birge, bıyl týǵanyna 1150 jyl tolǵan ál-Farabı atamyzdyń Damask qalasyndaǵy jáne elimizdegi túrli sharalardyń basyn qosatyn ulttyq komıssııa jospary bar», - dedi mınıstr.
Otyrysta Memleket basshysy qoıǵan tapsyrmalar, sportty damytý jáne «Adaldyq alańy» jobasyn júzege asyrý máseleleri talqylandy.
