Aqtoty Raıymqulova: Túrkistanda 21 han men 59 batyrdyń súıegi jatyr

NUR-SULTAN. QazAqparat – Túrkistanda súıegi jatqan tulǵalar qazaq halqynyń ǵana emes, kúlli túrki álemi tarıhynyń qalyptasýynda sheshýi ról atqarǵan. Mádenıet jáne sport mınıstri Aqtoty Raıymqulova «Túrkistan – túrki áleminiń rýhanı astanasy atty» halyqaralyq beınekonferentsııada osyndaı pikir bildirdi, dep habarlaıdy QazAqparat tilshisi.

«Búgin biz túrki halyqtarynyń kıeli oryny - Túrkistannyń saıası, rýhanı jáne mádenı qaıta jańǵyrýynyń tarıhı sátine kýá bolyp otyrmyz. Qala Uly Jibek jolynyń qıylysynda tur. Batys pen Shyǵysty, Shyǵys pen Batysty baılanystyryp, Qytaıdan Ortalyq Azııa, Taıaý Shyǵys arqyly Ortalyq Eýropa elderine kerýender ótken bolatyn. XV ǵasyrdan bastap Túrkistan musylman áleminiń qajylyq etetin orny ǵana emes, mańyzdy tarıhı sheshimder qabyldanatyn qazaq handarynyń iri memlekettik rezıdentsııasy bolǵan», - deı kelip mınıstr kóne shahardy máńgilik mekenine aınaldyrǵan uly tulǵalarǵa toqtaldy.

«Qalanyń tarıhı bóligi kıeli mánge ıe ekeni barshaǵa málim. Bul jerde ǵylymı derekterge sáıkes 21 hannyń, 8 sultannyń, 23 bıdiń, 59 batyrdyń súıekteri jerlengen. Jánibek, Jáńgir, Esim, Táýke, Abylaı, Ábilhaıyr handardyń, sondaı-aq, qazaq tarıhyndaǵy ataqty Qaz daýysty Qazybek bı, Shoń bı, Toraıǵyr bı, Bógenbeı batyr sııaqty basqa da tulǵalardyń beıitteri ornalasqan. Bul tulǵalar kóptegen jaǵdaılarda tek qazaq halqynyń ǵana emes, jalpy túrki álem tarıhynyń qalyptasýynda sheshýshi ról atqarǵan», - dedi Aqtoty Raıymqulova.

Atalmysh sharada Túrkistan oblysynyń ákimi Ómirzaq Shókeev Túrkistannyń túrki áleminiń rýhanı astanasy atanýyn tarıhı ádildik dep baǵalaıtynyn aıtty.