Aqtoty Raıymqulova: Týrıstik alym somasyn máslıhat, tóleý tártibin Úkimet bekitedi

NUR-SULTAN. QazAqparat – Elimizde basym týrıstik aýmaq uǵymy engizilendi. Bul týraly Senattyń jalpy otyrysynda týrıstik qyzmet máseleleri boıynsha zań jobasyn birinshi oqylymda talqylaý kezinde QR Mádenıet jáne sport mınıstri Aqtoty Raıymqulova málim etti, dep habarlaıdy QazAqparat tilshisi.

A. Raıymqulova zań jobasynyń negizgi jańalyqtaryna toqtal kele, Basym týrıstik aýmaq uǵymyn engizý eskerilgenin aıtty.

«Basym týrıstik aýmaq - týrıstik kartanyń respýblıkalyq obektiler tizimine engizilgen, týrıstik damýdyń erekshe áleýeti bar aýmaq. Basym týrıstik aýmaq resýrstardy týrızmdi damytýdyń perspektıvaly núktelerinde shoǵyrlandyrý maqsatynda qurylady.

Sondaı-aq, bul aýmaqta ınvestorlar úshin erekshe jeńildikter jáne qazaqstandyqtardyń elde demalýǵa baǵyttalǵan ilgeriletý sharalary qarastyrylǵan», - dedi mınıstr.

Sonymen qatar ol sheteldik týrısterge qatysty týrıstik alym júıesin engizý qarastyrylǵanyn atap ótti.

«Álemdik tájirıbeni eskere otyryp, ishki jáne syrtqy týrıstik naryqtarda aımaqtyq týrıstik áleýetti ilgeriletý úshin jergilikti bıýdjettiń qosymsha kózderin tabý maqsatynda sheteldik týrısterge týrıstik alym engizý ári osy alym boıynsha operatorlardy anyqtaý josparlanyp otyr. Týrıstik alym mólsherlemesiniń ózin máslıhat, al tóleý tártibin Úkimet bekitedi», - dedi A. Raıymqulova.