Aqtoty Raıymqulova: Tımýr Bekmambetov bizge birqatar stsenarııin usyndy

NUR-SULTAN. QazAqparat – Mádenıet jáne sport mınıstri Aqtoty Raıymqulova álemge áıgili kınorejısser Tımýr Bekmambetovtiń Ózbekstannyń Týrızm elshisi bolýyna qatysty pikir bildirdi, dep habarlaıdy QazAqparat tilshisi.

Ortalyq kommýnıkatsııalar qyzmetinde ótip jatqan brıfıngide Mádenıet jáne sport mınıstrine Tımýr Bekmambetovti el týrızmin nasıhattaýǵa nege tartylmaǵany týraly saýal qoıylǵan edi.

«Kórshimiz Ózbekstannyń ony Týrızm elshisi retinde áriptestikke tartýyn qýana qabyldadyq. Tımýr Bekmambetov ǵalamdyq tulǵa ekenin bilesizder. Onyń jobalary álemniń túrli elderinde iske asyp jatyr. Onyń ishinde bizdiń elde de jobalary qarastyrylǵan bolatyn. Týrızm elshilerine qatysty aıtsam, búginde Qazaqstannyń týrızm elshisi bolyp júrgen tanymal tulǵalar barshylyq. Dımash Qudaıbergen men Samal Eslıamova da bar. Árıne, Tımýr Bekmambetovti de qarastyrǵan bolatynbyz. Biraq pandemııaǵa baılanysty jáne basqa da sebeptermen onyń elimizge keletin múmkindigi bolǵan joq», - dedi Aqtoty Raıymqulova.

Mınıstrdiń málimeti boıynsha, keleshekte elimizde Tımýr Bekmambetov atsalysatyn kınojobalar iske asýy múmkin.

«Tımýr Bekmambetovpen birge josparlanǵan kınemotagrafııalyq jobalarymyz bar. Onyń tarapynan óz daıyndaǵan stsenarıılerin iske asyrý boıynsha usynys bar. Onyń bizdiń eldiń de Týrızm elshisi bolýyn qarastyramyz. Biz ol otandasymyzdy maqtan tutamyz. Týrızm elshisin taǵaıyndaýdyń qatyp qalǵan reglamenti joq. Bir eldiń atynan ǵana sala elshisi bolý kerek degen talap qoıylmaıdy. Sondyqtan bul baǵytta jumys isteımiz. Ókinishke qaraı, pandemııa kóptegen jobalardy, sonyń ishinde Tımýr Bekmambetovtiń qatysýymen ótetin josparlardyń merzimin shegerýimizge májbúr bolyp otyrmyz», - dedi Aqtoty Raıymqulova.