Aqtoty Raıymqulova oqýshylarǵa elektrondyq fortepıano syıǵa tartty

NUR-SULTAN. QazAqparat – Bilim kúni Mádenıet jáne sport mınıstri Aqtoty Raıymqulova elordadaǵy №72 mektep-lıtseıdiń oqýshylary men ustazdaryn merekemen quttyqtady, dep habarlaıdy QazAqparat tilshisi.

Mektepke kelgen mınıstr aldymen robototehnıka jáne STEAM-zerthanalaryn aralap shyqty. STEM-baǵyty (science, technology, engineering, math) negizgi akademııalyq pánderdi qamtıdy. Bul jerde oqýshylardyń jeti kýrstan ótýine múmkindigi bar. Odan keıin jas jetkinshekterge sertıfıkattar beriledi. Robototehnıka kabınetinde oqýshylar Mádenıet jáne sport mınıstrine óz robottarynyń múmkindikterin kórsetti.

«Osy oqý jylynyń eń basty jańalyǵy – «Pedagogtardyń mártebesi týraly» zańnyń qabyldanýy bolmaq. 16 tamyzda ótken tamyz konferentsııasynda QR Prezıdenti tórt jyl ishinde pedagogtardyń jalaqysy eki esege artatynyn málimdedi. Biz bul baǵyttaǵy qadamdar eldegi bilim sapasyn jaqsartýǵa úlken úles qosady degen úmittemiz», - dedi Aqtoty Raıymqulova.

Osydan keıin mınıstr jańa oqý jylyna qadam basqan oqýshylarǵa sáttilik tiledi.

«Qymbatty oqýshylar! Men sizderdi birinshi oqý kúnimen quttyqtaımyn. Mektep sizderdiń súıikti oryndaryńyzǵa aınalýyn tileımin. 11-12 jyldan keıin, ıaǵnı mektep bitirgen soń sizder mektep jyldaryn erekshe súıispenshilikpen eske alasyzdar. Men sizderge úzdik bolýǵa jáne ómirde súıikti isińizdi tabýlaryńyzdy tileımin. Ómirde óz jolyn taýyp, elimizdiń damýyna sapaly úles qosa berińizder», - dedi ol.

Osydan keıin vedomstvo basshysy lıtseı oqýshylaryna elektrondy fortepıano syıǵa tartty. QazAqparat tilshisine bergen suhbatynda Mádenıet jáne sport mınıstri mınıstrlerdiń jappaı mektepterdi aralaýy izgi dástúrge aınalaryna senim bildirdi.

«Búgin maǵan №72 mektep-lıtseıge baryp, bir jaǵynan resmı tulǵa - mádenıet jáne sport mınıstri retinde, ekinshi jaǵynan ana retinde kópshilikke tilek bildirý baqyty buıyrdy. Balalar 1 qyrkúıekte úlken úmitpen keledi. Biz olardy bolashaqta olımpıada, konkýrs, festıvaldardyń jeńimpazdary bolady dep kútemiz. Sondyqtan, bul tamasha bastama dástúrge aınalǵanyn qalaımyn», - dedi ol.

Aıta ketsek, elordadaǵy №72 mektepte 4 759 bala oqıdy. Onyń 742-i mektep tabaldyryǵyn birinshi ret attap otyr. 150 bala bıyl 11-synypty bitiredi.