Aqtoty Raıymqulova qansha mektepte sport zaly joq ekenin aıtty

NUR-SULTAN. QazAqparat – Elimizdegi 1 970 mektepte sport zaly joq. Bul týraly QR Mádenıet jáne sport mınıstri Aqtoty Raıymqulova málim etti, dep habarlaıdy QazAqparat tilshisi.

«Óńirler usynǵan statıstıkalyq málimetterge sáıkes, mektep oqýshylarynyń ishinde 1 mln 365 myń bala dene shynyqtyrý jáne sportpen shuǵyldanady. Bilim jáne ǵylym mınıstrliginiń derekteri boıynsha 2019 jyly 5 428 mektep sport zalymen qamtamasyz etilgen. Bul rette Almaty men Nur-Sultan qalalarynda, sondaı-aq Atyraý, Qyzylorda, Mańǵystaý oblystarynda mektepterdi sport zaldarmen qamtamasyz etýdiń eń joǵary deńgeıi baıqalady. Іs júzinde mektepterdiń 37 paıyzy oqý baǵdarlarmalary aıasynda qajet sporttyq qural-jabdyqtarǵa degen tapshylyqty sezinýde», - dedi A. Raıymqulova Parlament Májilisindegi Úkimet saǵatynda.

Onyń sózine qaraǵanda, 1 970 mektepte sport zaly joq. Sonymen qatar, aýyldaǵy sport saýyqtyrý keshenderiniń jelisi aýyl turǵyndarynyń tek 30 paıyzyn ǵana qanaǵattandyrady.

«Bul jaǵdaı sport sektsııalarynyń jumysy men jastardyń sport klýbtaryn qurýdy bulaı tursyn, dene shynyqtyrý páni boıynsha mindetti sabaqtardy tolyq ótkizýge múmkindik bermeıdi. Sondyqtan da búgingi tańda mekten tys sporttyq is-sharalardy keńetý, qosymsha bilim berý muǵalimderin tartý, mekteptiń sport kúntizbesin qalyptastyrý boıynsha áli de jumystar júrgizý qajet ekenin atap ótkim keledi», - dedi Aqtoty Raıymqulova.

Budan buryn habarlanǵandaı, 2019 jyldyń qorytyndysy boıynsha elimizde dene shynyqtyrý jáne sportpen júıeli túrde shuǵyldanatyndar sany 5,7 mln adamǵa jetken. Bul jalpy halyqtyń 30,6 paıyzy.