Aqtoty Raıymqulova Golovkındi jeńisimen quttyqtady

NUR-SULTAN. QazAqparat - QR Mádenıet jáne sport mınıstri Aqtoty Raıymqulova kəsipqoı boksshy Gennadıı Golovkındi orta salmaqta IBF jəne IBO altyn belbeýlerin jeńip alýymen quttyqtady, dep habarlaıdy QazAqparat tilshisi.

«Qurmetti Gennadıı! Osy jekpe-jekti asyǵa kútken barsha jankúıerlerdiń jáne jeke ózimniń atymnan kəsipqoı sharshy alań tórindegi jeńisińizben quttyqtaımyn. Ýkraınalyq Sergeı Derevıanchenkomen ótken kezdesýde jeńiske degen qulshynysqa toly muqalmas qajyr-qaıratyńyz, kásibı sheberligin saqtaǵan sportshy ekenińizdi kórsettińiz. Búgingi talassyz jeńisińizben Qazaq eli əlemdik boks alpaýyttary lıderleriniń biri ekenin taǵy da dəleldeı tústińiz. Sizdiń jarqyn jeńisterińiz jas sportshylarǵa úlgi. Bul elimizdegi bokstyń damýyna, jastardy uly jeńisterge yntalandyrýǵa úlken alǵyshart. Týǵan eldiń týyn jeńisimen jelbiretken azamat retinde rızashylyǵymdy jetkize otyryp, aldaǵy ýaqytta da elimizdi qýanta beretinińizge shyn nıetpen senim bildiremin», - delingen Aqtoty Raıymqulovanyń Facebook-tegi quttyqtaýynda.

Aıta keteıik, búgin Nıý-Iorktegi Madison Square Garden arenasynda qazaqstandyq kásipqoı boksshy Gennadıı Golovkın (39-1-1, 35 KO) ýkraınalyq Sergeı Derevıanchenkomen (13-1, 10 KO) jekpe-jek ótkizip, upaı sanymen basym túsken edi.