Aqtoty Raıymqulova: Dımash Qudaıbergen Qazaqstannyń brendine aınaldy

NUR-SULTAN. QazAqparat – Mádenıet jáne sport mınıstri Aqtoty Raıymqulova Dımash Qudaıbergendi qoldap jatqan demeýshilerdiń bárine alǵysyn aıtty, dep habarlaıdy QazAqparat tilshisi.

«Álbette eń aldymen biz Dımashtyń árbir jetistigi úshin qýanatynymyzdy aıta ketkim keledi. Ol – Qazaqstannyń azamaty. Osynda oqydy, kolledjdi bitirdi, Qazaq óner ýnıversıtetin aıaqtady. Ótken jyly magıstr dıplomyn aldy. Memlekettik shákirtaqymen birge ol «Daryn» syılyǵy men «Qazaqstannyń eńbek sińirgen qaıratkeri» ataǵyn aldy. Bul – qurmeti joǵary ataq», - dedi Aqtoty Raıymqulova.

Mınıstr óz sózinde Dımashtan árdaıym qyzyqty jobalardy kútetinin bildirdi.

«Mádenıet jáne sport mınıstrligi óz tarapynan ony qoldaıdy, Nur-Sultandaǵy, Máskeýdegi, Amerıkadaǵy keshterin ótkizýge atsalystyq. Qazirgi tańda oǵan óte kóp demeýshi kómek kórsetetini aıta ketkim keledi. Ol Qytaıdaǵy «I am singer» baıqaýynyń jeńimpazy bolǵandyqtan, kelisimshartqa sáıkes jeńimpaz sondaǵy belgili bir sharalarǵa qatysýy kerek. Dımash «Slavıan bazary» baıqaýynda jeńgen kezde de ol sol jaqtaǵy (Belarýs) kontsertterge qatysqan edi. Árıne Qytaıdyń prodıýsserleri Dımashpen jumys júrgizýge asyq. Dımash Qudaıbergen Qazaqstannyń brendine aınala bastady. Árıne bizdiń mindetimiz – ony qoldaý», - dedi Aqtoty Raıymqulova.