Aqtoty Raıymqulova Bozjyra shatqalyndaǵy qonaqúı kesheni týraly pikir bildirdi
Bul týraly QazAqparat tilshisi QR Mádenıet jáne sport mınıstrlginiń baspasóz qyzmetine silteme jasap habarlaıdy.
Olar Mańǵystaý oblysynyń ákimi Serikbaı Turymovpen, ǵalymdarmen jáne jergilikti qoǵam ókilderimen kezdesip, Bozjyra shatqalyndaǵy týrıstik keshen qurylysynyń qazirgi jaǵdaıyn talqylady.
«Mańǵystaýda týrızmniń belsendi damyp kele jatqan baǵyttarynyń biri – jaǵajaı týrızmimen qatar, ekologııalyq týrızm. Ekologııalyq týrızmniń negizi – adamdy tabıǵı ortaǵa beıimdeýge baǵyttalǵan. Tabıǵat aıasynda saıahattaýdyń maqsat-múddesi osy. Mundaı saıahat barysynda týrısterdiń basty nazary aımaqtyń tabıǵı ereksheligi men «jabaıy tabıǵat» aıasynda demalýda bolady», - deıdi Aqtoty Raıymqulova.
Onyń aıtýynsha, bıyl shilde aıynda Rixos Water World qonaqúıiniń ashylýy týrısterdiń kóptep kelýine jáne ishki týrızmniń damýyna ońdy áser etti.
«Bastapqy kezeńde týrıster kópten kelgen jaǵdaıda ne isteýge bolatynyn durystap rettep almasa, durys uıymdastyrylmaǵan týrızm saldarynan týrıstik tabıǵı aýmaqtar jaqyn jyldary adamdardyń keri áserine tap bolady. Týrızmdi basqarý – týrısterdiń qajettiligin jáne týrıstik ınfraqurylym qurý arqyly bıznestiń ekonomıkalyq jaǵyn qamtamasyz etý ekenin umytpaý kerek. Sondaı-aq, tabıǵattyń bıologııalyq áralýandyǵy men mańyzdy ekologııalyq protsesterdi saqtap qalý kerek», - deıdi ol.
Sondaı-aq, ol tabıǵı aýmaqtardaǵy týrızmdi damytýǵa ne kedergi ekenin aıtty.
«Álemdik tájirıbe kórsetkendeı, erekshe qorǵalatyn tabıǵı aýmaqtardaǵy týrızmdi damytýdaǵy eń negizgi másele – týrısterdi qabyldaý men qyzmet kórsetetin mamandandyrylǵan ortalyqtardyń, qonaqúılerdi ornalastyrýdyń qazirgi zamanǵy yńǵaılylyq deńgeıiniń, qyzmet kórsetý deńgeıiniń tómendigi, usynylatyn qyzmetterdiń sapasy men olardyń quny arasyndaǵy sáıkessizdik, nysandardyń qurylysyna ınvestıtsııalardyń bolmaýy», - deıdi Aqtoty Raıymqulova.
