Aqtoty Raıymqulova aýyr atletıka bapkerleriniń arasyndaǵy janjal týraly pikir bildirdi
NUR-SULTAN. QazAqparat – QR Mádenıet jáne sport mınıstri Aqtoty Raıymqulova aýyr atletıkadan ulttyq qurama bapkerleriniń arasyndaǵy janjal týraly pikir bildirdi, dep habarlaıdy QazAqparat tilshisi.
Ortalyq kommýnıkatsııalar qyzmetinde ótken brıfıngide BAQ ókilderi Mádenıet jáne sport mınıstrine ózi baryp taǵaıyndap ketken aýyr atletıka bas bapkeriniń nege qazir jumys istemeı jatqanyn surady.
«Taldyqorǵanda ótken respýblıkalyq chempıonattan keıin búkil oblystardyń bas bapkerlerimen otyrys boldy. Solarmen aqyldasa otyryp, Dáýren Bekmahambetov degen azamatty bas bapker bolýǵa laıyqty dep eseptedik. Jalpy, zań boıynsha jáne reglamentke sáıkes bizdiń bul usynymyzdy Federatsııa óz atynan Ulttyq Olımpıadalyq komıtetpen birge Mınıstrliktiń Sport komıtetinde usynys retinde berýi kerek», -degen mınıstr jýrnalısterdi bul másele jyl aıaǵyna deıin sheshimin tabatynyna sendirdi.
«Sonymen qatar, osy suraq biz jyl aıaǵynda Aýyr atletıka federatsııasynda ótetin konferentsııada da qarastyrylady dep otyrmyz. Bul másele jyl sońyna deıin sheshiledi dep oılaımyn. Jalpy bári zań boıynsha, ret-retimen kele jatyr», - dedi vedomstvo basshysy.
