Aqtoty Raıymqulova Almatydaǵy «Mýzeıler sherýin» tamashalady
ALMATY. QazAqparat – Mádenıet jáne sport mınıstri Aqtoty Raıymqulova Almatyda ótip jatqan «Mýzeıler sherýi» aktsııasyn tamashalap qaıtty, dep habarlaıdy QazAqparat tilshisi.
Mınıstr Ortalyq memlekettik mýzeı men Á.Qasteev atyndaǵy Memlekettik óner mýzeıinde boldy. Olardyń árqaısysy kelgen meımandarǵa óz baǵdarlamalaryn usynady. Máselen, Qazaqstan Respýblıkasynyń Ortalyq memlekettik mýzeıi «Oıý-órnekter sóıleıdi» aktsııasyn ótkizip, shara barysynda kelýshiler belgili ǵalym Qanysh Sátbaevtyń ómiri men shyǵarmashylyǵyna arnalǵan kórmeni, ekspozıtsııalyq zaldar boıynsha sholý jáne taqyryptyq ekskýrsııalardy tamashalap, qazaqtyń buryndary turmysta, qarý-jaraqta, mýzykalyq aspaptarda, kostıýmderde qoldanǵan erekshe artefaktilermen tanysty. Qazaqstannyń tarıhy men mádenıeti boıynsha kvest-oıyndardan ótip, qolóner salasyndaǵy sheberlik sabaqtarǵa qatysty.
Al Á.Qasteev atyndaǵy Memlekettik óner mýzeıi usynǵan shyǵarmashylyq aktsııasynyń ataýy – «Qazaqstandyq ónerdiń qazynasy» dep ataldy. Ol Halyqaralyq mýzeıler kúnin jyl saıyn toılaýdy unatatyn almatylyqtar úshin ashyq esik formatynda ótti.
Munda belgili qazaqstandyq músinshi Sáken Narynovtyń músininiń saltanatty ashylýy uıymdastyryldy. Mýzeı zaldary boıynsha tegin taqyryptyq ekskýrsııalar ótkizilip, qazaqstandyq sýretshilerdiń shyǵarmashylyǵy týraly fılmder kórsetildi. Bı jáne mýzykalyq ujymdardyń óneri kópke usynylyp, shyǵarmashylyq sheberlik saǵattary da umyt qalǵan joq.
Jobanyń maqsaty - mýzeıdiń aýdıtorııasyn keńeıtý, kelýshilermen qarym-qatynas ornatýdyń jańa tásilderin engizý, murajaılardy mádenı demalys orny retinde tanymal etý, halyqtyń qalyń kópshiliginiń ulttyq mádenı murasyn tanystyrý bolyp otyr.
«Qazir mýzeıler jańa formattardy izdestirý ústinde. Ózderińiz biletindeı, jyl saıyn mamyr aıynda ótkiziletin «Mýzeıdegi tún» halyqaralyq aktsııasy bizdiń elimizde de keń aýqymda uıymdastyrylady. Mine, osyndaı sátti format ta ómir súrýge laıyq, damýǵa qaqy bar. Sondyqtan búgingi aktsııa «Mýzeıler sherýi» dep atalady. Qazir bul format qanshalyqty qyzyqty ekenin túsingimiz keledi. Men osy jerge arnaıy kelip, bizdiń tamasha muralarymyz halyq úshin qoljetimdi bolýy úshin ne isteýimiz kerek ekenin kórip, kóp úrdisti túsinip otyrmyn», - dedi Aqtoty Raıymqulova.
Mınıstr óz sózinde qory baı bolǵandyqtan, mýzeılerge kirý, tanysý qoljetimdi bolý kerek ekenin atap ótti.
«Mundaı aktsııalar kestege sáıkes ár óńirdiń nemese qalanyń murajaılarynda aı saıyn tórtinshi jumada ótkiziledi. Ár óńirde nemese qalanyń ákimdigi keste jasaıdy. Bul estafeta sııaqty. Búgin túnde sherý Almatyda ótse, kelesi aıda Qyzylordada oblystyq «Aqmeshit» tarıhı-ólketaný murajaıynyń fılıalynda uıymdastyrylady», - dedi vedomstvo basshysy.
Aqtoty Raıymqulova qazirgi zamannyń damý ádisterin qosyp, jastardy qyzyqtyrý kerektigin aıtty. Ár mýzeıdiń óziniń biregeı tarıhy bar. Sonymen birge, mınıstr atalmysh joba aıasynda túni boıy jumys júrgizetin mýzeı qyzmketkerleri týraly da sóz qozǵady.
«Bári de zań aıasynda jumys istep jatyr. Mýzeı qyzmetkerleri bekitilgen kestege sáıkes eńbek etedi. Keıin olarǵa tıisti demalys berý men kótermeleý tetikteri qarastyrylǵan. ıAǵnı, olardyń quqyǵy shektelip jatqan joq», - dedi Aqtoty Raıymqulova.
Eske sala ketsek, elimizde «Mýzeıler sherýi» atty jalpyrespýblıkalyq aktsııa 30 tamyzda bastalǵan bolatyn. Atalmysh shara Elbasy Nursultan Nazarbaevtyń «Rýhanı jańǵyrý» jáne «Uly dalanyń jeti qyry» baǵdarlamalyq maqalasyn iske asyrý aıasynda qolǵa alynyp otyr. Aktsııaǵa respýblıkalyq jáne aımaqtyq mýzeıler qatysady. «Mýzeıler sherýi» aktsııasy arqyly mádenıet uıymdary ulttyq mádenı muranyń qoljetimdiligin qamtamasyz etýdi kózdep otyr.
