Aqtoty Raıymqulova aqparat salasy qyzmetkerlerin marapattady
«Sizderdi tól merekelerińiz - aqparat salasy qyzmetkerleri kúnimen shyn júrekten quttyqtaımyn! Sizder jaýapty, tynymsyz da qarbalas salada qyzmet etip kelesizder. Laıym qoǵamdyq oıdyń qozǵaýshy kúshine aınalyp, təýlik boıy aqparat taratyp júrsizder. Qazir elimiz biraz qıynshylyqty bastan ótkerip otyr. Kúlli əlemdi álekke salǵan karantın qalypty ómirimizge ózgeris engizip, biraz josparlarymyzdy keıinge qaldyrdy. Ókinishke qaraı, Sizdermen josparlanǵan dástúrli kezdesýimiz bıyl ótpeıtin boldy. Biraq bul sizdermen baılanysta bolyp, jumysymyz jaıly aqparat bólisýge, suraqtaryńyzǵa jaýap berýge esh kedergi bola almaıdy», - dedi mınıstr.
Sonymen qatar Aqtoty Raıymqulova atqarylyp jatqan is-sharalar týraly da aıtyp, mınıstrlik jýrnalıstermen tyǵyz jumys isteýge daıyn ekenin jetkizdi.
«Bıyldyń ózinde mədenıet, sport, týrızm, til saıasaty salasynda birqatar keshendi sharalar atqaryldy. Memleket basshysynyń Joldaýyn iske asyrý aıasynda 2020 jyldyń 1 qańtarynan mádenıet jáne óner uıymdary qyzmetkerleriniń jalaqysy respýblıkalyq deńgeıde 50, óńirlerde 35 paıyzǵa deıin ósti. Jalpy, mundaı ósim shamamen 34 myń adamdy qamtydy. Osy jyldyń basynan bastap qyzmetin toqtatqan jáne kásibı eńbek ótili keminde 20 jyl bolatyn balet ártisterine aı saıyn sońǵy 3 jyldyq ortasha jalaqysynyń 60%-ǵa deıingi mólsherinde tólemder beriletin boldy. Sport salasyndaǵy jattyqtyrýshy-oqytýshy, muǵalimderdiń, 4 mektep-ınternat-kolledj ben sport kolledji tárbıeshileriniń, balalar-jasóspirimder sport mektebi jattyqtyrýshy-oqytýshylarynyń jalaqysy kóteriledi. Bıyl əlemdik deńgeıdegi oıshyl Abaı Qunanbaıulynyń 175, ǵulama ǵalym Əbý Nasyr əl-Farabı babamyzdyń 1150, Altyn Ordanyń 750 jyldyq mereıtoıyn atap ótip jatqanymyz belgili. Bul rette Sizderdiń aqparattyq qoldaýlaryńyz arqyly bizge degen el senimi arta túspek. BAQ ókilderi qoǵam men bılik arasyndaǵy altyn kópir bola alady degen úmittemiz. Bizdiń áriptestigimiz aldaǵy ýaqytta da jemisti bolyp, el ıgiligi jolynda qyzmet ete beremiz dep senemin», - dedi A.Raıymqulova.
Aıta keteıik, Mədenıet jəne sport mınıstri Aqtoty Raıymqulova «Qurmet» gramotasymen - 12, «Mádenıet salasynyń úzdigi» medalimen - 13, Alǵys hatpen - 30 jýrnalısti marapattady.
Qazirgi əlemdik koronavırýs pandemııasyna jəne karantın shekteýlerine baılanysty mınıstr barsha jýrnalısterdi vıdeoúndeý arqyly quttyqtady.
