Aqtoty Raıymqulova — Halyqaralyq túrki mádenıeti men murasy qorynyń Prezıdenti
Roza Baǵlanova atyndaǵy «Qazaqkontsert» memlekettik kontserttik uıymynyń dırektory Qazaqstannyń eńbek sińirgen qaıratkeri, ónertaný ǵylymdarynyń doktory, DBA, professor, kompozıtor Aqtoty Raıymqulova 2023 jylǵy 3 qarasha kúni Túrki memleketteri uıymynyń H sammıti otyrysynda Túrki memleketteri elderiniń Memleket basshylary qabyldaǵan sheshimge sáıkes Halyqaralyq túrki mádenıeti men murasy qorynyń Prezıdenti qyzmetine taǵaıyndaldy. Bul týraly Kazinform agenttigi qazaqconcert.kz-ke silteme jasap habarlaıdy.
«Aqtoty Rahmetollaqyzy 2022 jyldyń sáýir aıynan bastap mekemeniń tizginin ustap, mádenıet salasyndaǵy uzaq jylǵy tájirıbesi men biliktiligin 60 jyldan astam tarıhy bar qazaq mýzyka óneriniń qara shańyraǵyna aınalǵan «Qazaqkontsert» uıymynyń abyroı-bedelin asqaqtatýǵa baǵyttady.
Memleket basshysy Qasym-Jomart Kemeluly Toqaevtyń bastamalaryn júzege asyrý úshin elimizdiń túkpir-túkpirine mádenı qundylyqtardyń qoljetimdiligin qamtamasyz etý jolynda «El birligi-jańa Qazaqstan» gastroldik jobasy, álem elderi mádenıetin shyǵarmashylyq yntymaqtastyǵyn bir sahnada biriktirgen «ALEM SAZ» mýzyka festıvali, babalarymyzdan bastaý alatyn halyq óneri men mádenıetin barynsha nasıhattaý jolynda «Ulylarǵa taǵzym» jobasy, jas kórermenge arnalǵan «Balalar fılarmonııasy» syndy jobalarǵa muryndyq bolyp, uıymnyń abyroıyn halyqaralyq arenalarda asqaqtatyp, ulttyq ónerimizdi álemge tanytýǵa súbeli úles qosty. «Qazaqkontsert» qabyrǵasynda jasaǵan ult rýhanııatyn ulyqtaǵan ár jobasy kórermen tarapynan oń baǵalandy. Qazaq estradasynyń kúlli mańdaıaldy daryndaryna joldama bergen «Gúlder» ansamblin jańǵyrtý jobasynyń basy-qasynda bolyp, sátti júzege asyryp, qazaq bı óneriniń brendine aınalǵan ansambldi halyqpen qaıta qaýyshtyrdy.
«Qazaqkontsert» ujymy Aqtoty Rahmetollaqyzyn aqylman basshy, isker uıymdastyrýshy, jarqyn bastamalardyń qoldaýshysy retinde erekshe baǵalap, qurmet tutady», — delingen «Qazaqkontsert» mekemesiniń habarlamasynda.
Aıta keteıik, Aqtoty Rahmetollaqyzynyń basshylyǵymen 62-kontserttik maýsymdaǵy 10 aı ishinde «Qazaqkontserttiń» shyǵarmashylyq ujymdary men ártisteri, ákimshilik qyzmetkerleriniń bir arnaǵa jumylyp, aýyzbirshilikpen jemisti qyzmet etip, el aýmaǵynda jáne halyqaralyq deńgeıde kontsertter, festıvalder, kınokórsetilimder, sheberlik sabaqtary, dáris-kontsertter, kórmeler jáne taǵy basqa túrli deńgeıdegi 379 is-shara ótkizdi.
