Aqtós, Mýrka, Sharık: elde úı janýarlaryna eń kóp qoıylatyn attar anyqtaldy
ASTANA. KAZINFORM — Qazaqstanda úı janýarlaryn esepke alýdyń biryńǵaı aqparattyq júıesi — TAÑBA jumys isteıdi. Qazir júıede 400 myńǵa jýyq ıt pen mysyq jáne basqa da úı janýarlary tirkelgen.
Ekologııa jáne tabıǵı resýrstar mınıstrliginiń málimetinshe, TAÑBA júıesinde janýar men onyń ıesi týraly negizgi málimetter, sondaı-aq vaktsınatsııa, sterılızatsııa jáne ózge de veterınarııalyq rásimder týraly aqparat jınaqtalady. Janýar tirkelgen kezde onyń aty, tuqymy, jynysy, týǵan kúni, sáıkestendirý nómiri jáne ıesi kórsetilgen elektrondyq pasport qalyptastyrylady.
Búginde júıede 291 761 ıt jáne 107 414 mysyq esepte tur.
Itter arasynda eń tanymal at — Aqtós. Bul esim 8 863 ıtke qoıylǵan. Odan keıin Sharık (6 027), Reks (5 409), Týzık (4 243) jáne Laıka (4 137) keledi. Úzdik ondyqqa Arlan (3 012), Moınaq (2 382), Alapar (2 056), Barsık (2 004) jáne Barbos (1 963) engen.
Mysyqtar arasynda Mýrka esimi kósh bastap tur — bul atty 2 236 mysyq ıelengen. Ekinshi orynda Mýsıa (1 529), úshinshi orynda Barsık (1 491). Sondaı-aq Mýrzık (842), Sonıa (833), Ryjık (721), Sımba (698), Alısa (657), Vasıa jáne Kýzıa (604-ten) keń taralǵan.
TAÑBA-da sırek kezdesetin úı janýarlary da bar. Máselen, júıede segiz qoıan, tórt kúzen jáne bir-birden tasbaqa, sándik egeýquıryq, shaǵyn tuqymdy shoshqa, atjalman men kapıbara tirkelgen.
Olardyń arasynda erekshe attar da kezdesedi. Mysaly, tasbaqa — Aısha, atjalman — Tompı, shaǵyn tuqymdy shoshqa — Bıblık, sándik egeýquıryq — Fınık, kapıbara — Borıs dep atalǵan. Qoıandardyń arasynda Kembrıdj, Oksford, Rafınad jáne Snejınka, al kúzender arasynda Pırojok, Ýmka, Kıpısh jáne Jıja esimderi bar.
Júıede teńiz shoshqalary, shınshıllalar, maımyldar men kirpilerdi de tirkeýge arnalǵan sanattar qarastyrylǵan. Ázirshe bul janýarlardyń ókilderi tizilimge engizilmegen.
Eske salaıyq, buǵan deıin elimizde úı janýarlaryn ustaý erejeleri ózgergenin habarlaǵanbyz.
