Aqtolaǵaı borly taýy aýmaǵynda barlaý jumysy júrip jatqany ras pa
AQTÓBE. KAZINFORM – Kómirsýtekti barlaý jáne óndirý kelisimsharty 2022 jyly jasaldy jáne ol 2028 jylǵa deıin jaramdy. Barlaý kompanııasy Aqtolaǵaıdaǵy 618,86 sharshy shaqyrymdy keri qaıtarǵan.
QR Energetıka mınıstrligi men «West Precaspian Company» JShS arasyndaǵy kelisimshart 2022 jyly tamyz aıynda jasaldy. Kelisimshart aıasynda Aqtóbe oblysynyń Baıǵanın aýdanynda ornalasqan «Shuńqyrqol» ýchaskesinde kómirsýtekterdi barlaý jáne óndirý jumystaryna ruqsat berilgen. Alǵashqy kelisimshart boıynsha aýmaqtyń jalpy kólemi 3 066,57 sharshy shaqyrym boldy. Keıin barlaý kompanııasy jerdiń bir bóligin keri qaıtarǵan.
- 2025 jyly 5 qyrkúıekte kompanııa 777,05 sharshy km bolatyn jerdi, onyń ishinde aýdany 618,86 sharshy shaqyryp bolatyn №2 blokty (Aqtolaǵaı-red.) erikti túrde qaıtardy. Aqtolaǵaı taýlaryna jaqyn aýmaq, onyń ishinde aýdany 618,86 sharshy km bolatyn jerde geogııalyq barlaý jumystary júrgizilgen joq. Qazirgi kezde kelisimshart boıynsha jerdiń aýdany – 2 295, 47 sharshy shaqyrym.
Kelisimsharttyń qoldanylý merzimi 2028 jylǵy tamyzǵa deıin, - dep habarlady Aqtóbe oblystyq kásipkerlik jáne ındýstrıaldyq-ınnovatsııalyq damý basqarmasy.
Eske salsaq, 2023 jyly týrıstik kompanııa ókilderi men kópshilik arasynda narazylyq týyndap, barlaýǵa berilgen jer kólemi qaıta qaraldy. Sol kezde Aqtóbe oblystyq ekologııa departamenti Aqtolaǵaıdyń respýblıkalyq nemese oblystyq mańyzdy aýmaqqa kiretini belgileýdi usyndy.
