Aqtolaǵaı borly taýy aýmaǵyna jaqyn mańda barlaý jumysy júrip jatyr

AQTÓBE.KAZINFORM – Aqtóbedegi Aqtolaǵaı borly taý mańynda munaı qoryn anyqtaý úshin barlaý júrip jatyr.

Aqtolaǵaı borly taýy mańyndaǵy barlaý jumysy aıaqtalǵan soń ony óndirý kelissózderi júrgizilýi múmkin.

— Baıǵanın aýdanyna qarasty Aqtolaǵaı borly taýy mańynda kómirsýtek shıkizatynyń qoryn anyqtaý úshin barlaý jumysy júrip jatyr. Bul jer qoınaýyn paıdalanýshy men QR Energetıka mınıstrligi arasyndaǵy kelisimshart aıasynda atqarylyp jatqan jumys. Barlaý jumysy aıaqtalyp, qor hattamasy bekitilgen soń ony óndirý kelisimi júrýi múmkin. Bul aýmaq týraly kóp syn aıtyldy. Jergilikti turǵyndar tabıǵı qorǵalǵan jer dep qarsylyq ta bildirdi. Keıin erekshe qorǵalatyn aýmaq pen barlaý júrgiziletin jerdiń arajigi ajyratyldy, — dedi Aqtóbe oblystyq ındýstrııalyq-ınnovatsııalyq damý basqarmasy basshysynyń orynbasary Azamat Qudaıbergenov. 

Eske salsaq, byltyr tamyzda Aqtolaǵaı borly taýy aýmaǵyndaǵy munaı qoryn anyqtaý úshin barlaý júrgiziletini belgili boldy. Turǵyndar men qoǵam belsendileriniń qarsylyǵynan soń Aqtóbe oblystyq Ekologııa departamenti erekshe qorǵalatyn aýmaqtyń terrıtorısyn naqty anyqtaýdy mindettedi. Alǵashynda barlaý Aqtolaǵaı taýynan 2 shaqyrym qashyqtyqta dep kórsetildi. Keıin ony 9 shaqyrym dep ózgertý usynyldy.