Aqtoǵaıda taǵy bir ken baıytý fabrıkasy salynady
ÓSKEMEN. QazAqparat - Shyǵys Qazaqstannyń Aqtoǵaı ken ornynda taǵy bir baıytý farıkasy salynbaq, dep habarlaıdy QazAqparat tilshisi.
Aqtoǵaıdaǵy mys óndirisiniń kólemin eki esege deıin arttyratyn jańa jobamen oblys ákimi Danıal Ahmetov arnaıy issapar kezinde tanysty. Alǵashqy mys kontsentratyn 2017 jyly alyp bastaǵan óndiris oshaǵy qazir jyl saıyn 110-130 myń tonna mys shyǵarýǵa qaýqarly. Jyl basynan beri 95,4 myń tonna mys óndirgen ujym jyl sońyna deıin bul mejeni erkin oryndaıtyndaryna senimdi.
Jalpy Aqtoǵaı kenishi - álemdegi mysqa eń baı oryndardyń biri. Mundaǵy mys qory 28 jylǵa jetedi degen esep bar. Osynshama kendi ıgerý úshin taǵy bir baıytý fabrıkasyn salý josparlanyp otyr. Birinshi ken baıtyý fabrıkasy jylyna 25 mln tonna sýlfıdti kendi óńdeıtin bolsa, 2021 jylǵa qaraı eki fabrıka birigip, 50 mln tonna kendi óńdeıtin bolady. Osynyń arqasynda 2027 jylǵa qaraı jylyna 170 myń tonna mys alý kózdelip otyr.
«Aqtoǵaı mys basseıninde mańyzdy óndiristik kezeń bastaldy. Bul - búkil Qazaqstan úshin mańyzdy oqıǵa. Jobanyń quny 1,2 mlrd dollardy quraıdy. Al biz óz tarapymyzdan Aqtoǵaı stansasyna aparatyn joldy jóndeý jumysyn qolǵa alamyz. 2019 jyldyń birinshi jartysynda kenshiler jol azabyn umytatyn bolady» - dedi Danıal Ahmetov.
Onyń aıtýynsha, salynyp jatqan fabrıkada oblys jastary jumys isteýi tıis. Ol úshin oblys ákimdigi Aqtoǵaı ken baıytý fabrıkasy úshin mamandar daıarlaý isin jolǵa qoımaqshy.
