Aqtoǵaıda mektep qurylysyna bólingen 45 mln teńge qoldy bolǵan – agenttik

NUR-SULTAN. QazAqparat – Qaraǵandy oblysy Aqtoǵaı aýdanynyń turǵyn úı-kommýnaldyq sharýashylyq, jolaýshylar kóligi jáne avtomobıl joldary bóliminiń basshysy asa iri kólemde bıýdjet qarajatynyń jymqyrylý faktisi boıynsha kúdikti dep tanylyp otyr, dep habarlaıdy QazAqparat tilshisi.

«Osy jyldyń 13 naýryzynda Sybaılas jemqorlyqqa qarsy is-qımyl agenttiginiń Qaraǵandy oblysy boıynsha departamentiniń Balqash aımaǵy boıynsha aýdanaralyq bólimi Aqtoǵaı aýdanynyń turǵyn úı-kommýnaldyq sharýashylyǵy, jolaýshylar kóligi jáne avtomobıl joldary bólimi men «Aspap» óndiristik kesheniniń laýazymdy tulǵalarynyń bıýdjet qarajatyn jymqyrý faktisi boıynsha sotqa deıingi tergeýdi bastady. Olar Aqtoǵaı aýdany Saryshaǵan kentindegi «464 oryndyq mektep qurylysy» nysanyna «Nurly jol» memlekettik baǵdarlamasy aıasynda bólingen 45 mln teńgeden astam bıýdjet qarajatyn jymqyrdy degen kúdikke ilinip otyr», - dedi QR Sybaılas jemqorlyqqa qarsy is-qımyl agenttiginiń 1-shi departamentiniń aǵa tergeýshisi Danııar Bıgaıdarov agenttikte onlaın rejimde ótken baspasóz máslıhatynda.

Kúdiktilerge qatysty túpkilikti sheshimdi sot qabyldaıdy.