Aqtoǵaıda bıyl 61 myń tonna mys óńdeldi - ShQO
ÓSKEMEN. QazAqparat - Shyǵys Qazaqstannyń Aıagóz aýdanyna qarasty Aqtoǵaı ken ornyndaǵy mys óndirý jumysy jańa deńgeıge shyqty. Atap aıtqanda, 2018 jyldyń 6 aıynda munda 61 myń tonna mys óńdelgen, dep habarlaıdy QazAqparat tilshisi.
Ótken jylǵa qaraǵanda bıyl ken quramyndaǵy mystyń úlesi azaıa bastaǵan. Byltyr bul kórsetkish 0,75 paıyz kóleminde bolsa, bıyl 0,62 paıyzdy qurap otyr. Soǵan qaramastan, jalpy óndiriste ósim bar. Bul fabrıkanyń jumys qarqyny kúsheıgenin bildiredi. Alǵashqy 6 aıda sýlfıdti kennen 49 myń tonna mys, oksıdti kennen 11,5 myń tonna mys alynyp otyr.
Jyl kóleminde Aqtoǵaı kenishinen 110-130 myń tonna mys alý kózdelgen. Jarty jyldyń kórsetkishi sol mejeni oryndaýǵa úlken múmkindik týǵyzyp otyr. Óndirilgen mys kólemi - 61 myń tonna. Jalpy Aqtoǵaıdaǵy ken qory 28 jylǵa jetedi dep eseptelgen. 2021-2027 jyldar aralyǵynda keshenniń eki birdeı ken baıytý fabrıkasy tolyq iske qosylyp, jobalyq qýatyna enýi tıis. Bul shaqta jylyna 190 myń tonna mys alynady degen jospar bar.
«2018 jyldyń birinshi jartysynda biz joǵary operatsııalyq kórsetkishterge qol jetkizdik. Aqtoǵaı baıytý fabrıkasynyń joǵary ótkizý múmkindigi 2017 jyldyń birinshi jartysymen salystyrǵanda 18 paıyzdyq ósimge sebepker boldy. Іlespe ónimder óndirý baǵytynda da jumys jandandy» - deıdi KAZ Minerals tobynyń basqarma tóraǵasy Endrıý Saýzam.
