Aqtoǵaıda ashylǵan stadıonda 92 jastaǵy qart júgirip ótti - Pavlodar oblysy

PAVLODAR. QazAqparat - Táýelsizdiktiń 30 jyldyǵyna oraı Aqtoǵaı aýdanynda jańa sport stadıony ashyldy, dep habarlaıdy QazAqparat Pavlodarnews.kz-ke silteme jasap.

Aqtoǵaý aýdandyq ishki saıasat bóliminiń málimetinshe, bul kúni jańa stadıonda «Saý bol, júz jasa!» atty uranmen densaýlyq festıvali ótti.
Densaýlyq festıvali aıasynda jańa alańda jalpy jattyǵý, sondaı-aq jas toptary boıynsha jeńil atletıkalyq júgirý ótkizildi. Jeńil atletıka boıynsha jarystan eń úlken qatysýshy 92 jastaǵy Alı Almıashev boldy.
- Kishkentaı kezimnen sportpen shuǵyldanamyn. Qysta qatty aıazda shańǵymen 50 shaqyrym júrip ótemin. Áli kúnge deıin qys mezgilinde juqa kıimmen júgiremin. Sport densaýlyǵymdy nyǵaıtady. Sondyqtan sportpen aınalysyńyzdar dep aıtqym keledi, - deıdi Alı Almıashev.

Jańa stadıonnyń aýmaǵy - 6000 sharshy metr. Trıbýnalar ornatylyp, jasandy kógal tóselgen, 2 myń sharshy metr tartan jabyndysy bar júgirý joly salynǵan, jaryqtandyrý júrgizilip, qorshaýlar ornatylǵan.​ Sonymen qatar, stadıon aýmaǵynda jaǵajaı fýtboly men jaǵajaı voleıbolyna arnalǵan alańdar bar.

- Búginde aýdanda barlyq turǵyndarǵa sportpen aınalysý qoljetimdi bolý úshin barlyq jaǵdaı jasalýda. Bizdiń birlesken kúsh-jigerimiz mindetti túrde laıyqty nátıje beretinine senemin, - dedi Aqtoǵaı aýdanynyń ákimi Qarshyǵa Arynov.

Aqtoǵaı aýdany óziniń sport tarıhyn jáne onyń dańqty dástúrlerin maqtan tutady. Óńirde aıtarlyqtaı nátıjelerge qol jetkizgen ataqty chempıondar men rekordshylar az emes. Olar - Vıktor Makeev, Darhan Jolamanov, Suńǵat Qaıyrtaev, Ǵabıdolla Saǵyndyqov jáne basqalar.
- Biz aýdanymyzda jańa stadıonnyń ashylǵanyna óte qýanyshtymyz, óıtkeni buryn aýylda tek shaǵyn fýtbol alańdary bolǵan. Aqtoǵaıda jańa tehnologııalar boıynsha salynǵan stadıonnyń paıda bolýymen sportpen aınalysatyn adamdardyń sany artady degen oıdamyz, - dep atap ótti jastar ókili.

Aýyl turǵyndary «Densaýlyq buryshynda» dárigerlerden densaýlyqty saqtaý jáne nyǵaıtý, qan qysymyn, qandaǵy qant deńgeıin ólsheý jáne t.b. keńes ala alyp, Covid-19-ǵa qarsy vaktsına alý múmkindigi boldy.
Aqtoǵaı aýdany oqýshylarynyń komandalary arasynda alǵashqy joldastyq match uıymdastyryldy.