Aqtóbeniń Jyltyr aýylynda qum toqtatý jumysy bastaldy

AQTÓBE. KAZINFORM — Aqtóbe oblysy Shalqar aýdany Jyltyr aýylynda qum toqtatý jumysy bastaldy. Aýylǵa 20 myń túp kóshet egiledi.

Shalqar aýdany Jyltyr aýylynyń turǵyndary qum tek qoraǵa emes, úıge de kire bastaǵanyn aıtyp, byltyr kómek surady. Bıyl qum toqtatý jumysy bastalyp ketti. 

⁠— Shalqar aýdanyndaǵy Jyltyr aýylynda kóshpeli qumdy toqtatý jumysy qolǵa alyndy. Kóshetti «Úlken-Borsyq orman jáne janýarlar dúnıesin qorǵaý mekemesi» KMM-i egip beredi, — dedi Aqtóbe oblystyq Tabıǵı resýrstar jáne tabıǵatty paıdalanýdy retteý basqarmasynyń bólim basshysy Erkebulan Talaspaev. 

Al Shalqar aýdany ákimdigi taratqan aqparatqa súıensek, bıyl jergilikti bıýdjetten 7 mln teńge bólindi. Jumysty óz mindetine alǵan «Amanbaev» JK-i qum shyǵarý jumysyn júrgizip jatyr. Keıin kóshet egý jumysy bastalady.

Aıta keteıik, Aqtóbede barlyǵy 19 aýylda qum kóshkini máselesi bar. Olar Temir, Yrǵyz, Shalqar, Baıǵanın aýdandarynda ornalasqan.