Aqtóbeniń ishki týrızminde qaı baǵyttar suranysqa ıe
AQTÓBE. KAZINFORM – Aqtóbe oblysy boıynsha qazir 18 týrıstik marshrýt bar. Óńir turǵyndary kóktemde Qasqyr sarqyramasyna baryp jatyr. Keıin Aqtolaǵaı borly taýy, Aqqumǵa suranys artady. Visit Aqtobe ortalyǵy bolsa, bıyl kúzde Qytaıda Aqtóbeniń týrmarshrýtynyń tanystyrylymyn jasaýdy josparlap otyr.
Ár aýdannyń óz brendi bar
Aqtóbede barlyq aýdanda týrıstik marshrýt bar. Máselen Qobda aýdanynda Abat Baıtaq, Qobylandy batyr kesenesi men Álııa aýyly, Bulaq aýyldaryna barýǵa bolady. Bul týrıstik marshrýt tarıhı tanymdy keńeıtýge baǵyttalǵan. Kóbine oqýshylar men stýdentter barady.
Al Yrǵyz aýdanynda Yrǵyz-Torǵaı tabıǵı qoryǵy men Jamanshyń kraterimen tanysýǵa bolady.
Áıteke bı aýdanynda Kishi júz hany Ábilqaıyr jerlengen jer bar. Kesene 2015 jyly kúzde salyndy. Shalǵaı jer bolǵanymen, bul tarıhı, kıeli meken.
Oıyldyń Kókjar jármeńkesi bolsa, tarıhı ǵımarattary saqtalǵan jalǵyz oryn sanalady.
Al Aqtolaǵaı men Aqqumǵa arnalǵan týrıstik marshrýt sońǵy jyldary ǵana ashylyp, joǵary suranysqa ıe bola bastady. Munda qazaqstandyqtarmen qatar, sheteldikter de qyzyǵady.
- Jaz aılarynda basqa elden, oblystan týrıster kóp keledi. Byltyr aqparattyq týr ótip, damýǵa serpin bergeni ras. Ózgeden kórip, bilgen adamdar «Aqtolaǵaıǵa, Aqqumǵa apar» dep jıi usynys tastady. Al jergilikti aqtóbelikter Mártók ormany men Qarǵalydaǵy Qasqyr sarqyramasyna barady. Máselen Qysqyr sarqyramasyna barý quny 5 myń teńge bolady. Bul baǵyt óz shyǵynyn ózi ǵana óteıdi. Biz kólik jaldaımyz, gıdke tóleımiz. Ózge tabys ta, shyǵyn da joq. Negizi biz, týroperatorlar sheteldik týr uıymdastyryp tabys tabamyz, al ishki týrızmniń marshrýttary qosymsha jarnama alańy ispetti. Osy arqyly tepe-teńdikti saqtaýǵa bolady, - dedi týroperator Erkebulan Aımuratuly.
Onyń aıtýynsha, byltyr óńirge shetelden kóp adam keldi. Gonkong, Ýkraına, Reseı, Japonııa men Qytaıdan da kelip, arnaıy Aqtolaǵaı baǵytyn tańdaǵandar jeterlik.
Sonymen birge sheteldikter «Dımashtýrdy» tańdaıdy. Kóbine óńirde jyl saıyn ótkiziletin «Baqytty bala» baıqaýyna kelip, ánshi Dımash Qudaıbergenmen júzýdesýdi maqsat etedi.
- Sońǵy jyldary ánshiniń ózi bul baıqaýdyń qonaǵy bolyp kelmeı júr. Biraq sheteldikter sonda da kúder úzbeı kelip, ol oqyǵan mektepke barady, ustazdarymen kezdesedi. Mýzykalyq kolledjge baryp, ustazy Marat Áıtimovpen júzdesedi. Ózi turǵan úıine de barady,- dedi Erkebulan Aımuratuly.
Týroperatordyń Aqtóbede burynǵy týrmarshrýtty qaıta jańǵyrtýǵa arnalǵan jobalary da bar. Ol da óńirdiń tabıǵı ereksheligin kórsetýge arnalǵan baǵyt.
- Sońǵy jyldary Aqtóbe týrızminde ilgerileý bar. Bıyl Muǵaljar aýdanyna barǵymyz keledi. Onda Orqash tabıǵı qaýmaly men Muǵaljar taýlarynyń bókterin aralasaq deımiz. Burynnan jol bolmaı, qıynalǵan edik. Sonymen birge sý tasqynynyń da keri áseri tıip jatyr. Oıyl ormanyna bıyl bara almaımyz. Sebebi ol jaqqa qatynas qıyndady, sonymen birge týrısterge qyzmet kórsetip otyrǵan jeke kásipker de tasqynda zardap shekti. Baǵasy týraly aıtar bolsaq, ishki týrızmdi kóp degende jylyna 1 myń teńgege qymbattatyp jatyrmyz. Sebebi bizge qyzmet kórsetetin salalarda baǵa ósimi bar, - dedi Erkebulan Aımuratuly.
Aqtóbeniń týrıstik baǵyttaryn tanystyrý jalǵasady
Jergilikti ákimdik Aqtóbeniń týrmarshrýttaryn tanystyrý aqparattyq jumysyn jalǵastyrdy. Byltyr Óskemen, Qostanaı, Shymkent qalalarynda, Qytaıdyń Pekın, Shanhaı, Ońtústik Koreıanyń Seýl qalalarynda da roýd-shoý ótti.
- Bıyl – Qazaqstannyń Qytaıdaǵy týrızm jyly. Biz Qytaıda tanystyrylym jasadyq. Al qazan aıynda sol elde Aqtóbe oblysynyń kúnderi ótpek. Sonymen birge bıyl qonaqúılermen arada memorandýmǵa qol qoıyldy. Olar týrısterge 5-10% jeńildik jasaıdy. Jospar boıynsha «Aqtóbe» FK birlesip murajaı ashýdy josparlap otyrmyz. Aıyna bir kún ashyq esik kúni ótip, adamdardyń tanysýyna jaǵdaı jasalýy múmkin. Turǵyndar, týrıster kirip, alańdy kórip, tanyssa deımiz. Mundaı sátti qanshama bala ańsań júr?! Ári «Jandy sabaqtar» jobasy aıasynda oblystaǵy tarıhı, mádenı oryndardy tanystyrǵymyz keledi. Kóbine qala balalary qamtylady. Biz qaýipsizdik úshin polıtsııa, medıtsına qyzmetkerlerin qatar ertip júremiz. Ony biz qyrkúıek aıyna bekitip otyrmyz. Balalar Mártók, Qarǵyly aýdandaryna saparǵa shyǵyp, túrli nysandardy aralaıdy, - dedi Visit Aqtobe týrıstik-aqparattyq ortalyǵynyń dırektory Manat Taıpaqov.
Onyń aıtýynsha, kópshilik týrıstik jerlerdi áleýmettik jeli arqyly tanıdy. Sondyqtan sol aımaqtar aldyn ala túsirilip, kópshilikke tanystyrylady.
- Sáýir, mamyr aılarynda Qarǵaly aýdanyndaǵy Qysqyr sarqyramasyna jıi barady. Ol jaqta aldymen biz monıtorıng júrgizemiz. Tazalyǵyn qarap, jaǵdaıyn baqylaımyz. Sáýir-mamyr aılarynda 15-16 myń adam qamtyldy. Ásirese senbi, jeksenbi kúnderi kóp barady,- dedi Manat Taıpaqov.
Aıta keteıik, Aqtóbege byltyr 186 myńnan astam adam keldi. Onyń 162 myńy ishki týrıster bolsa, ózgesi sheteldik. Aqtóbede týrmarshrýttar ekologııalyq, mádenı-tanymdyq, kıeli jerler baǵyty dep bólinedi.
