Aqtóbeniń shekaralas aýyldarynda áli kúnge deıin «qyzyl pasportpen» júrgender bar

AQTÓBE. KAZINFORM – Aqtóbe oblysynda qansha adamnyń áli kúnge deıin Keńes Odaǵynyń qujatyn ustap júrgeni belgisiz. Mamandar basyna qıyn is túskende, dárigerge qaralarda jáne zeınetke shyǵar kezde adamdardyń kómek suraıtynyn aıtyp berdi.

Aqtóbe oblysyndaǵy aýyr turmystyq jaǵdaıdaǵy tulǵalardy qaıta áleýmettendirýge arnalǵan ortalyqtyń mamandary qyzmet alýshylardyń qujatyn rásimdeýge kómektesetin mekemeniń biri.

Munda túsken adamnan aldymen tólqujaty suralady. Sońǵy kezderi esh qujatsyz qalǵan adamdar kelip, jyldar boıy beımálim kúı keship júr. 

- Ortalyqta qujattardy rásimdeýge kómektestý qyzmeti de bar. Qazirgi kezde tórt azamattyń qujatyn qalpyna keltirý, qaıta jasaý qıynǵa soǵyp tur. Biri - Reseıdiń Amýr oblysynyń týmasy. Onyń osylaı júrgenine 5 jyldan astam ýaqyt ótti. Іs alǵa jyljymaı qoıdy. Oǵan azamattyqty da, azamattyǵy joq adamdar kýáligin de bere almaımyz. Eger osy qujat bolsa, qarııany qarttar úıine jiberer edik. Bul mekemeniń ózi bir jyl ǵana turýǵa arnalǵan. Jalpy osyndaı qıyndyqty sheshe almaı júrgen 4 adam bar, - dedi Aqtóbe oblysyndaǵy aýyr turmystyq jaǵdaıdaǵy tulǵalardy qaıta áleýmettendirýge arnalǵan ortalyqtyń zańgeri Tomırıs Qaramanqyzy.

Munda qazir 50-dan astam qyzmet alýshy bar. Kóbi qujatyn joǵaltyp alyp, mekemege kelgen kezde qaıta rásimdep alǵan. 

Bul problema óńirdegi úkimettik emes uıym múshelerine de jaqsy tanys. Olar Reseımen shekaralas aýyldarda áli kúnge deıin «qyzyl pasportpen» júrgen adamdardyń kóp ekenin aıtady. 

- Aqtóbeniń Qarǵaly men Mártók aýdandarynda mundaı jaǵdaı jıi kezdesedi. Sebebi bul aýdandar Reseımen shektesedi. Qajet bolsa bizdiń zańger Oral qalasynda ornalasqan elshilikke aparyp, ákeledi. Keıde polıtsııa qyzmetkerleri, Aqtóbe oblysyndaǵy aýyr turmystyq jaǵdaıdaǵy tulǵalardy qaıta áleýmettendirýge arnalǵan ortalyqtyń mamandary da keıde bizge baǵyttap otyrady, - dedi «Dáris-2016» uıymynyń atqarýshy dırektory Gúlnur Edigeeva. 

Aqtóbe oblystyq PD Kóshi-qon basqarmasy da adamdardyń qujat rásimdeý jumysyn júrgizedi. Munda bıyl quqyqtyq statýsy joq 5 adamǵa azamattyq berilip, bireýi azamattyǵy joq tulǵa retinde tirkeldi. 2023 jyly barlyǵy 83 adamnyń quqyqtyq statýsy anyqtaldy. Onyń 60-y Qazaqstan azamaty dep tanyldy. 

- 1992 jylǵa deıin Qazaqstanda turǵan, sonymen birge Qazaqstanda týǵan adamdar Qazaqstan azamaty dep tanylady. Qazirgi kezde Aqtóbe oblysyndaǵy aýyr turmystyq jaǵdaıdaǵy tulǵalardy qaıta áleýmettendirýge arnalǵan ortalyqta keıbir adamdardyń qujatyn rásimdeý qıynǵa soǵady. Máselen Moldova eliniń azamaty týraly qujatty sol elden kútemiz. Bizdiń elde Moldovanyń elshiligi joq. Suranys jiberilip, ol elde mundaı azamat bolmasa, azamattyǵy joq tulǵa dep tanylady. Qalaı bolǵanda da bar nemese joq degen jaýap kelýi tıis,- dedi Aqtóbe oblystyq PD Kóshi-qon basqarmasynyń bastyǵy Elmıra Baltaeva.

Onyń aıtýynsha, adamdar óz ýaqytynda qujatyn rásimdemeı, zeınetke shyǵar kezde oılanady. Sonymen birge «tólqujat jasatyp beremin» degen adamǵa qolynda bar qujatyn berip, ýaqyt ótkizip alady.