Aqtóbeniń shalǵaı aýylynda iri qara ýlandy

AQTÓBE. KAZINFORM – Dúken aýylynyń turǵyny óriste buzaý ólgenin habarlap, kómek surady. Veterınarlar tekserýden soń ýlaný dıagnozyn qoıdy. Bul – aldyn ala boljam. 

Aqtóbe oblysy Yrǵyz aýdanynyń Nura aýyldyq okrýgine qarasty Dúken aýylynda óriste mal ólgeni týraly habarlama tústi.

– Aýyl turǵyny óristegi buzaýlardyń ólimi týraly aıtty. Aýdandyq veterınarııa mamandary oqıǵa ornyna baryp, mal óliminiń sebepterin tekserip jatyr, - dep habarlady Yrǵyz aýdandyq ákimdigi. 

Keıin oblystyq veterınarııa basqarmasy mán-jaıdy tekserdi. Habarlama keshe túsip, aýyl turǵyny mamandarǵa múıizdi iri qara arasyndaǵy aýrý belgileri týraly aıtyp bergen. 

– Habar túskennen keıin veterınarııalyq mamandar jedel túrde oqıǵa ornyna baryp, epızootııalyq tekserý júrgizdi. Mal ıesiniń aıtýynsha, 1–10 tamyz aralyǵynda bıylǵy tólden aýrý baıqalǵan. Alaıda bul týraly ol mal dárigerlerine aldyn ala habar bermegen. Tekserý barysynda D. Qoıshybaevtyń eki bas iri qarasy ólgeni, taǵy bir bas maldyń aýyrǵany anyqtaldy. Aýyryp turǵan mal soıylyp, patologııalyq materıaldar alynyp, Aqtóbe oblystyq veterınarııalyq zerthanasyna jiberildi. Aldyn ala qoıylǵan dıagnoz – ýlaný. Ólgen janýardyń ólekseleri arnaıy mal qorymyna shyǵarylyp, joıyldy. Qalǵan mal basy veterınarııalyq mamandardyń baqylaýyna alyndy, - dep habarlady Aqtóbe oblystyq veterınarııa basqarmasy. 

Eske salsaq, Aqtóbede alty aıda 2 myńnan astam iri qaradan brýtsellez anyqtaldy. Іri qaramen qatar 400-den astam qoı-eshkiden de brýtsellez tirkeldi. Maldan aýrý shyqqan aýlalar zalalsyzdandyryldy.