Aqtóbeniń shalǵaı aýyldarynda iri qara maldyń neden qyrylǵany belgili boldy
AQTÓBE. KAZINFORM — Saraptama qorytyndysynda iri qaradan teılerıoz anyqtaldy, ıaǵnı kene shaǵyp, parazıttik aýrý juqqan.
Іri qara ólimi 21 maýsym men 14 shilde aralyǵynda tirkeldi. Bir aıǵa jýyq ýaqyt ishinde Yrǵyz aýdany Qyzyljar aýyldyq okrýgi aýmaǵynda 39 iri qara óldi.
— Saraptama qorytyndysy hattamasyna sáıkes teılerıozǵa oń nátıje anyqtaldy. Teılerıoz — ıksod keneleriniń shaǵýy arqyly beriletin, transmıssıvti jolmen juǵatyn parazıttik aýrý. Infektsııanyń taralýyna yqpal etken faktor — mal ıeleriniń teılerıoz endemııalyq aımaqtardan mal tasymaldaýy. Qazirgi ýaqytta veterınarııalyq qyzmet mamandary epızootologııalyq tekserý jumysyn júrgizip jatyr. Teılerıoz asa qaýipti aýrý qataryna jatpaıdy. QR zańnamasynda mal ıeleriniń shyǵynyn óteý qarastyrylmaǵan, — dep habarlady Aqtóbe oblystyq veterınarııa basqarmasy.
Veterınar mamandar aýyrǵan maldy negizgi tabynnan bólip emdep jatyr. Sondaı-aq maldy jaıylymǵa baqtashysyz jiberýge bolmaıdy. Ári kenege qarsy óńdeý sharasyn júrgizý jáne jańadan mal satyp alǵan kezde veterınar mamandaryna dereý habarlaý mindetteldi.
— Ólekse jyljymaly ınsıneratorlarda joıylady. Qazir mal ólý faktileri toqtady. Emdeý sharalary jalǵasyp, epızootııalyq jaǵdaı Aqtóbe oblysynyń veterınarııa basqarmasy men Yrǵyz aýdanynyń veterınarııalyq qyzmetiniń turaqty baqylaýynda bolady, — dep habarlady basqarma.
Eske salsaq, Yrǵyz aýdany Sheńbertal jáne Qurylys aýyldarynda turǵyndar mal qyrylyp jatqanyn aıtyp, kómek surady. Alǵashqy kezde zerthanada mal aýrýy dál anyqtalmaı, qosymsha synama alyndy.
