Aqtóbeniń Oıyl aýdanyna Qarýly kúshterdiń ınjenerlik-saperlik brıgadasy keledi

AQTÓBE. KAZINFORM – Qonaev garnızonyndaǵy Qarýly kúshterdiń ınjenerlik-saperlik brıgadasy Oıyl aýdanyna jiberiledi. Munda áskerıler qaýipsiz tasymaldaý qyzmetin atqarady.

Aqtóbeniń Oıyl aýdanynda qazirgi kezde turǵyndar qaıyqpen qatynap júr. Bul aýdanda ortalyqpen qatar Aqshataý, Qarasý, Qaraoı, Qubasaı aýyldaryna barar joldarda kezekshilik qoıylǵan. QR Qorǵanys mınıstrligi búgin Oıyl ózeniniń boıyndaǵy aýyldar arasyna ýaqytsha ótkel salý úshin Qonaev garnızonyndaǵy Qarýly kúshterdiń ınjenerlik-saperlik brıgadasynyń áskerı qyzmetshileri jiberilgenin habarlady.

- Pontondyq kópir parkiniń elementteri temirjol platformasyna tıeldi. Onyń ishinde tonnalyq avtomobıl-pontondyq kópir segmentteri bar eki kólik (KrAZ-255B), sýda júzetin transporter jáne KamAZ jáne KrAZ bazasynda eki súıretkish-motorly qaıyq bar. Tehnıkany maıor Naýryz Tóleýovtyń basshylyǵymen 58012 áskerı bóliminiń 11 áskerı qyzmetshisinen quralǵan top alyp júredi. Mamandar baılanys quraldarymen jáne qosymsha zattarmen jabdyqtalǵan. Áskerı ınjenerler bul jerge kelgennen keıin turǵyndardy, tehnıkany, materıaldyq quraldardy jáne janýarlardy tasymaldaý úshin ótkel jasaıdy,- dep habarlady QR Qorǵanys mınıstrligi. 

Aıta keteıik, byltyr dál osy Oıyl aýdanyna ponton kópir ákelindi. Júk pen adamdardy ponton kópir arqyly tasymadady. 

Qazirgi kezde Aqtóbege Qyzylordadan TJD-niń 31 qyzmetkeri keldi. Olar Yrǵyz aýdanyna jiberildi. Baýyrjan Momyshuly atyndaǵy 28237 áskerı bóliminiń áskerı qyzmetkerleri qosymsha kúsh retinde Hromtaý, Qobda, Oıyl aýdandaryna bardy. Olar qapqa qum toltyryp, jaǵalaýlardy, bógetti bekitý jumystaryn júrgizip jatyr.