Aqtóbeniń ortalyq saıabaǵynda 15 jastaǵy qyzdy uryp-soqqan kúdiktiler ustaldy

AQTÓBE. KAZINFORM – Aqtóbedegi ortalyq saıabaqta mektep oqýshysyn uryp-soqqandardy polıtsııa anyqtady. 

Soqqynyń astynda qalǵan qyz qazirgi kezde aýrýhanada jatyr. 

Aqtóbelik turǵyn áleýmettik jeli arqyly oqıǵanyń 3 tamyz kúni saǵat 18:15 shamasynda bolǵanyn habarlady. Ol qala ortalyǵyndaǵy saıabaqtyń Týtuǵyr mańynda úsh qyz onyń balasyn uryp-soqqanyn aıtyp, kórgen-bilgen adamdardy izdedi. Sebebi sol soqqydan soń qyzy aýrýhanaǵa túsken. Dárigerler onyń betindegi jarasyn tikken. 

– Áleýmettik jeli arqyly habarlama berip, kórgen-bilgen adamdardan vıdeoaıǵaq tapqym keldi. Qyzym qurbysymen birgen bolǵan. Biz polıtsııaǵa da aryz túsirdik. Qazir tergeý júrip jatyr ári polıtsııanyń jumysyna aralasqym kelmegen soń aty-jónimdi jasyryn ustaımyn. Sol kezde olar qyzymnyń telefonyn tartyp alǵan. Bir áıel aralasyp, kómektesip, ony qaıtaryp bergen. Oǵan alǵys aıtamyn, - dedi qala turǵyny. 

Qazirgi kezde buzaqylyq faktisi boıynsha qylmystyq is qozǵalyp, tergeý júrip jatyr. 

– Sol jerde bolǵandardyń kim ekeni anyqtalyp, olar polıtsııa bólimine jetkizildi. Bala tárbıesine salǵyrt qaraǵany úshin kámeletke tolmaǵandardyń ata-analary da jaýapqa tartylady. Zańǵa qaıshy kez kelgen is jazasyz qalmaıdy. Ata-analar da balalary jasaǵan quqyqbuzýshylyqqa jaýapty ekenin eskergen jón, - dep habarlady Aqtóbe oblystyq PD baspasóz qyzmeti. 

Eske salsaq, Balqash qalasynyń turǵyny kishkentaı ulyn eresek adam azaptaǵanyn málimdedi. Onyń aıtýynsha, 8 jastaǵy balany er adam aıaýsyz soqqyǵa jyqqan, saýsaqtaryn syndyrǵan jáne denesin kúıdirgen.