Aqtóbeniń ortalyq meshitindegi oqıǵaǵa baılanysty QMDB málimdeme jasady

AQTÓBE. KAZINFORM – Qazaqstan musylmandary dinı basqarmasy meshittiń shyǵa berisindegi esik aldynda qyzǵa orynsyz sóz aıtqan er adamnyń isin aıyptady. Bul – musylmandyqqa jat qylyq. 

Qazir áleýmettik jelide Aqtóbedegi meshit ishinde bolǵan oqıǵa týraly túrli pikir tarap jatyr. Qazaqstan musylmandary dinı basqarmasy osyǵan oraı málimdeme jasady.

– Meshit – qulshylyq pen tárbıe ordasy. Onda kelgen árbir azamat ózin ádeppen, izetpen ustaýǵa mindetti. Islam sharıǵatynda ózgege til tıgizý, orynsyz sóz aıtý, ásirese áıel zatyna qolaısyz pikir bildirý – musylman ádebine saı kelmeıtin jáne aıyptalatyn is-áreket. Qazaqstan musylmandary dinı basqarmasy Aqtóbedegi oqıǵada qyz balaǵa orynsyz sóz aıtqan azamattyń áreketin aıyptaıdy. Óıtkeni mundaı áreket musylmandyqqa jat, ári adamgershilik qaǵıdattaryna da saı emes. QMDB jamaǵatty sabyr men parasattylyqqa shaqyryp, jalǵan aqparat pen arandatýshylyq áreketterge ermeýge úndeıdi. Qoǵamda beıbitshilik pen ózara qurmet mádenıetin qalyptastyrý – barshamyzdyń ortaq jaýapkershiligimiz, - dep jazylǵan málimdemedi. 

Eske salsaq, Aqtóbe turǵyny ortalyq meshitke baryp, esik aldynda ózin bógep turǵan er adam týraly jazdy. Keıin bul oqıǵa kópshilik arasynda keń tarap, talqyǵa tústi. Polıtsııa meshit ishinde kelýshige tıisken er adamdy polıtsııa bólimshesine jetkizdi. 

Sot qaýlysymen 42 jastaǵy er adam 5 táýlikke qamaldy.