Aqtóbeniń Móńke aýyly mańynda joldy sý shaıdy

AQTÓBE. KAZINFORM — Aqtóbedegi «Qandyaǵash-Embi-Shalqar-Yrǵyz» tasjolyndaǵy Móńke aýyly mańynda joldy sý shaıdy.

Derek búgin saǵat 17.00-de tirkeldi. «QazAvtoJol» UK» AQ habarlaýynsha, respýblıkalyq mańyzy bar «Qandyaǵash-Embi-Shalqar-Yrǵyz» avtojolynyń 194 shaqyrymy, ıaǵnı, Móńke bı aýyly mańynda qar erip, sý jol ústine kóterildi. 

«Qar sýynyń eni 20 metr, bıiktigi 3-5 sm shamasynda boldy. Atalǵan ýchaskede sý ótkizgish qubyr joq. Erigen qar sýynyń júrýin toqtatý úshin 10 jumysshy, júk kóligi men qum tasıtyn kólik jumyldyryldy. 100 qap qum jetkizildi, — dep habarlady «QazAvtoJol» UK» AQ.

Qazir óńirde kóktemgi sý tasqynyna qarsy shtab quryldy. Buǵan deıin habarlaǵanymyzdaı, Aqtóbe oblysy boıynsha 36 eldimeken sý basý qaýpi basym aýmaqta ornalasqan. Onyń altaýy respýblıkalyq mańyzy bar tasjolǵa jaqyn. «QazAvtoJol» AQ oblystyq fılıaly aqpanda tasqyndy boldyrmaý jumysyn bastady. Qazirgi kezde qaýpi basym aýmaqqa ınertti materıaldar tasymaldanǵan.