Aqtóbeniń Qoıbaǵar sý aıdynynda balyq qyryldy

AQTÓBE. KAZINFORM – Aqtóbe oblysy Yrǵyz aýdany Qoıbaǵar sý aıdynynda balyq qyryldy. Jalpy salmaǵy 70 keli bolatyn sazan, shortannyń qyrylý sebebi zerthanalyq tekserýden soń anyqtalady.

Tobyl-Torǵaı oblysaralyq basseındik balyq sharýashylyǵy ınspektsııasynyń habarlaýynsha, polıtsııa, veterınarııa qyzmeti men Amankól aýyldyq okrýgi ákimdiginiń ókilderi búgin Qutıkól aýylyndaǵy Qoıbaǵar sý aıdynyna bardy. 

— Qoıbaǵar sý aıdynynyń ózekshesinde jalpy salmaǵy 70 kg bolatyn sazan, shortan balyq anyqtaldy. Veterınarlyq qyzmeti sý jáne ólgen balyq synamalaryn alyp, zerthanalyq tekserýge jiberildi. Jınalǵan balyqtyń óleksesin veterınarııa qyzmetkerlerimen arnaıy zalalsyzdandyrý ornyna apardy. Balyq óliminiń naqty sebebi zerthanalyq tekserýlerden keıin belgili bolady. Qoıbaǵar kóli ýaqytsha sý aıdyny bolyp tabylady. Sebebi keı jyldary tolyǵymen keýip ketedi. Aqtóbe qalasynan shamamen 460 km jáne Qutıkól aýylynan 8 km qashyqtyqta ornalasqan. Sý aıdynyń aýmaǵy shamamen 30 gektar bolady. Ortasha tereńdigi — 1,8 metr, muz qalyndyǵy 35 sm. Jergilikti balyq sharýashylyǵyna mańyzy bar sý aıdyndary tizbesinde joq, — dep habarlady Tobyl-Torǵaı oblysaralyq basseındik balyq sharýashylyǵy ınspektsııasy. 

Eske salsaq, Shardarada 80 keliden astam zańsyz aýlanǵan balyq tárkilendi. Qazir sotqa deıingi tergeý amaldary júrgizilip jatyr.