Aqtóbeniń Kósembaı aýylynda daýyldan soń úılerdiń shatyry ushyp ketti
AQTÓBE. KAZINFORM - Aqtóbe oblysy Oıyl aýdany Kósembaı aýylynda qatty daýyldan soń úı men mektep janyndaǵy shaǵyn ortalyq, klýbtyń shatyry ushyp ketti. Adam din aman.
Qaıyńdy aýyldyq okrýginiń ákimi Kazinform tilshisine tótenshe jaǵdaı týraly baıandap berdi.
«Keshe saǵat 21:00 shamasynda on mınýt boıy daýyl turyp, jańbyr jaýdy. Sol 10 mınýt ishinde 35 úıdiń shatyry ushty. Tańerteń komıssııa qurylyp, adamdardan shyǵyn týraly aqparat jınady. Erteń erte baǵalaýshylar keledi dep otyrmyz. Sol kezde úıdiń shyǵyny esepteledi. Búginde Qaıyńdy, Kemer órt sóndirý jasaqtary kelip, kósheni tazalady. Ushqan aǵash, shıfer qaldyqtaryn jınap, polıgonǵa tasydy. Jalpy 35 dep aıtqanymmen, onyń 33-i turǵyn úı, bireýi klýb, bireýi mektep janyndaǵy shaǵyn ortalyq. Tótenshe jaǵdaıdy aýdan ákimi jarııalap ketti. Aýdan ákimi kelip, habaryn aıtty», - dedi Qaıyńdy aýyldyq okrýginiń ákimi Jazylbek Abıev.
Onyń aıtýynsha, adam aman, tek bir qoı ólgen.
«Barlyq úı jóndeýge keledi. Tek tóbe jabyndysy ushty, qalǵany aman. Mektep janyndaǵy balabaqsha 20 oryndyq. Búginge deıin istep turdy. Aýylda 380 adam turady. Barlyǵy 74 úı bar. Áli kúnge deıin aýylda jaryq joq», - dedi aýyl ákimi.
Aqtóbe oblysy ákiminiń baspasóz qyzmetiniń habarlaýynsha, 9 tirek baǵana qulaǵan. Qalpyna keltirý úshin «Energosıstema»JShS-niń 4 brıgadasy, ıaǵnı, 15 jumysshysy, 5 arnaıy tehnıkasy jumyldyryldy. Qazirgi ýaqytta 7 tirek baǵana qalpyna keltirildi.
Eske salsaq, Aqtóbe oblysy Qobda aýdanynda qatty daýyl men nóser jaýynnan eki qabatty úıdiń shatyry ushty. Aqtóbe qalasynda jaýyn kezinde jol opyrylyp, kópqabatty úıde káriz sýy keri aqty.
