Aqtóbeniń Qobda aýdanynda qatty daýyldan úı shatyry ushyp ketti

AQTÓBE. KAZINFORM - Qobda aýdanynda memleket balansyndaǵy eki qabatty úıdiń shatyry ushyp ketti. Úı 2019 jyly salynǵan.

Qobda aýdanynda qatty jańbyr jaýyp, jel kúsheıgen kezde úılerdiń shatyry ushty. Arasynda eki qabatty 8 páterli turǵyn úı de bar. 

«Úı 2019 jyly memlekettik tapsyrys arqyly salyndy. Keshegi daýylda shatyry túgel ushyp ketti. Aýylda shatyry ushqan, proflıst búlingen basqa da úıler bar. Biraq ondaı úlken shyǵyn joq. Tótenshe jaǵdaı bolǵan soń eki qabatty úıdiń shatyryn biz jóndeımiz. Shyǵynyn eseptetip, qarjy bólinedi. Búginnen bastap qujattaryna kiristik», - dedi Qobda aýdanynyń ákimi Іzgilik Tynymgereev.

Aıta keteıik, Qobda aýdany kóktemde sýǵa ketip, munda 100-den astam úı jaramsyz bolyp qaldy. Aýdan ortalyǵynda 130 úı boı kóterip jatyr.