Aqtóbeniń Qaratal aýylynda tasqyn kezinde buzylǵan úıler súrilip jatyr
AQTÓBE. KAZINFORM — Aqtóbe oblysy Oıyl aýdany Qaratal aýylynda 178 úı qaıta salynady. Qazir buzylǵan úılerdiń ornyn jınap, tazartý jumysy júrip jatyr.
Aqtóbe oblysy Oıyl aýdany Qaratal aýylynda 200-den astam úı bar.
Sý tasqyny kezinde onyń tek 19-y aman qalyp, jóndeýge jaramdy dep tanylǵan.
Al 178 úı qaıta salynady.
— Baǵalaý komıssııasy jaramdy dep tapqan 19 úıde adamdar turyp jatyr. Al ózgesine 125 shatyr, 25 dana kıiz úı berildi. Munda jaryq bar, al tamaq pisirýge qazan-oshaq, gaz qurylǵysy qoldanylyp jatyr. Buzylǵan turǵyn úılerdi qaıta salýǵa 2 JShS merdiger kompanııa tartylǵan. «Stroı standart» JShS 10 úıdi, «GTA servıs» JShS-i 4 úıdi bastaý úshin eski úılerdi súrdi. Qurylys materıaldary tasymalanýda, — dedi Sh. Bersıev atyndaǵy aýyldyq okrýg ákimi Nurlybek Shaýmenov.
Onyń aıtýynsha, aýyldaǵy 100-ge jýyq úıdiń tóbesi buzylǵan. Al 60 úıdiń orny tolyq tegisteldi.
— Aýdan boıynsha jan-jaqtan kómek baryp jatyr. Aldymen buzylǵan úılerdiń orny tegisteledi. Aýdan ákimdigi, qoǵamdyq shtab úndeýi tastady. Úı ıeleriniń áli kelmegen soń aýdandaǵy barlyq aýyldyq okrýgterinen, mekemelerden, bilim berý uıymdarynan adamdar bólek-bólek kelip, úılerdi bólip alyp, kómek kórsetip jatyr. Negizinen úı sol buzylǵan eski úıdiń ornyna salady. Onda ınfraqurylym bar ári turǵyndardyń óz qalaýy soǵan saı, — dedi Nurlybek Shaýmenov.
Eske salsaq, bıyl naýryz aıynyń sońynda Qaratal aýylyna sý kirip, turǵyndardy evakýatsııalaý qıynǵa soqty.
Keıin olardyń bári tikushaqpen Oıyl aýdanynyń ortalyǵyna jetkizildi.
