Aqtóbeniń Yrǵyz aýdanynda tótenshe jaǵdaı jarııalandy

AQTÓBE. KAZINFORM – Aqtóbe oblysy Yrǵyz aýdanynda da tótenshe jaǵdaı jarııalandy. Bul óńirdegi tótenshe jaǵdaı jarııalanǵan altynshy aýdan. Sonymen birge Aqtóbe qalasynda da túnde 100-den astam adam evakýatsııalandy. 

Aqtóbe oblysy boıynsha áli de jaǵdaı turaqty emes. Qarǵaly ózeni arnasynan asyp, Aqtóbe qalasyndaǵy baý-baqsha ujymynda adamdar evakýatsııalandy.

«Qarǵaly sý qoımasy toldy jáne Qarǵaly ózeninde sý deńgeıi kóterilip, Aqjar jáne Sadovoe turǵyn alaptary aýmaǵyndaǵy baý-baqsha ujymdaryn sý basý qaýpi týyndady. Tótenshe jaǵdaılar departamenti, jergilikti atqarýshy organ ókilderi, polıtsııa men áskerıler 140-tan astam adamdy qaýipsiz jerge kóshirdi. Olardyń 25-i bala», — dedi Aqtóbe qalasy ákiminiń baspasóz hatshysy Aıgúl Baımenova. 

Onyń aıtýynsha, túni boıy Qarǵaly ózeni boıynda ornalasqan baý-baqsha ujymdarynyń úıin saqtaý úshin sý burý, arnany bekitý jumystary júrgizildi. Sýdyń baǵytyn bógeý jumystaryna 80-nen asa áskerı, merdiger kompanııa ókilderi men 10-ǵa jýyq aýyr tehnıka jumyldyryldy. 

Aqtóbe oblysy ákiminiń baspasóz qyzmetiniń habarlaýynsha, Yrǵyz aýdanynda tasqyn sýdan kelgen zalal bar. Búgin munda jergilikti deńgeıde tótenshe jaǵdaı jarııalandy.

Eske salsaq, buǵan deıin Aqtóbe qalasy men Oıyl, Qobda, Muǵaljar, Temir, Áıteke bı aýdandarynda tótenshe jaǵdaı jarııalandy.