Aqtóbeniń bas sanıtarııa dárigeri sottaldy

AQTÓBE. KAZINFORM – Іs para alý jáne para berý baptarymen qozǵaldy. Para bergen de, ony alǵan da – memlekettik qyzmetshiler.

Aqtóbe qalasynyń №2 sotynda qalalyq Sanıtarııalyq-epıdemıologııalyq baqylaý basqarmasynyń basshysy Meıirjan Esimbaev, basqarmanyń jetekshi mamany Erbol Janǵabaevke Qylmystyq kodekstiń «Para alý» baby, oblystyq veterınarııa basqarma basshysynyń orynbasary Bolat Qazmuhambetovke «Para berý» baptary boıynsha aıyp taǵylyp, is qaraldy. Іs materıalyna súıensek, Bolat Qazmuhambetov 48 bala tárbıeleýge arnalǵan balabaqshanyń jumysyn júrgizýge, atap aıtqanda tárbıelenýshi sanyn arttyrýǵa ruqsat berýdi suraıdy.

Aqtóbe qalalyq Sanıtarııalyq-epıdemıologııalyq baqylaý basqarmasynyń basshysy Meıirjan Esimbaev qolastyndaǵy jetekshi maman Erbol Janǵabaevty shaqyryp alyp, qajetti qorytyndy rásimdep berýdi, ǵımarattyń tehnıkalyq qujatyn talapqa saı aıqyndaýdy tapsyrady. Nátıjesinde jetekshi maman balabaqshaǵa 75 balany qabyldaýǵa bolatyndaı etip qujat rásimdep, sanıtarlyq-epıdemıologııalyq qorytyndynyń jalǵan jobasyn jasaǵan. Al basqarma basshysy Meıirjan Esimbaev qorytyndyny rastap, qol qoıady.

Bul qyzmeti úshin Bolat Qazmuhambetovten 300 myń teńge aqsha alyp, onyń 90 myń teńgesin Bolat Qazmuhambetovke beredi. Sotta sottalýshy Bolat Qazmuhambetov taǵylǵan aıyp boıynsha kinásin tolyq moıyndady. Al basqarma basshysy Meıirjan Esimbaev ishinara moıyndap, para aldy dep aıyptalǵan Erbol Janǵabaev moıyndamady.

- Sot úkimimen sottalýshy Q. Qylmystyq kodekstiń 367-babynyń 2-bóligimen kózdelgen qylmystyq quqyq buzýshylyqty jasaǵany úshin kináli dep tanylyp, oǵan memlekettik qyzmetterde laýazymdardy atqarý quqyǵynan ómir boıyna aıyra otyryp, 3 jyl merzimge bas bostandyǵynan aıyrý túrindegi jaza taǵaıyndaldy. Sottalýshylar E. men J. Qylmystyq kodekstiń 366-babynyń 3-bóliginiń 2 tarmaǵymen kózdelgen qylmystyq quqyq buzýshylyqty jasaǵany úshin kináli dep tanylyp, árqaısysyna memlekettik qyzmetterde laýazymdardy atqarý quqyǵynan ómir boıyna aıyra otyryp, 7 jyl merzimge bas bostandyǵynan aıyrý túrindegi jazasy taǵaıyndaldy. Úkim zańdy kúshine engen joq, - dep habarlady Aqtóbe qalasynyń №2 sotynyń baspasóz qyzmeti.

Buǵan deıin habarlaǵanymyzdaı, Shalqar aýdany ákiminiń orynbasary Bekturǵan Zaırymbet pen turǵyn úı-kommýnaldyq sharýashylyǵy bóliminiń basshysy Altynbaı Berkimbaev 6 jylǵa bas bostandyǵynan aıyryldy. Ekeýi de alǵan aqshasyn keri qaıtarady.