Aqtóbeniń aınalasynda 100-den astam zańsyz qoqys alańy anyqtaldy

AQTÓBE. KAZINFORM - Aqtóbe qalasynyń aınalasynda qurylys materıaldarynyń qaldyǵy, kólik dóńgelekteri kóp. Polıtsııaǵa qoqysty kimniń tókkenin anyqtaý qıyn. 

Ekologtar men polıtsııa qoqys úıilgen aýmaqtardy baryp qarady. Endi ony jergilikti ákimdik bıýdjetten qarjy bólip, polıgonǵa tasýy tıis. 

— Orman alqabynyń aýmaǵynda qurylys qaldyqtar, turmystyq qatty qaldyq, kólik dóńgelekteri bar. Olardy kimniń tastap ketkeni belgisiz. Eger kimde kim ony kórip, bilse, polıtsııaǵa habar bergeni durys. Ásirese foto, beınematerıal bolsa deımiz. Qazirgi kezde ekologııa departamenti polıtsııamen birge reıd júrgizedi. Tek qoqystyń úıilgen jerin anyqtap júrmiz, kimniń tógip ketkenin bilmeımiz. Sondyqtan jergilikti atqarýshy organdarǵa hat jiberildi. Ekologııa kodeksi 365-baby 4-tarmaǵyna sáıkes kommýnaldyq qaldyqtardy tazartý solardyń mindeti, — dedi Aqtóbe oblystyq ekologııa departamentiń bas mamany — memlekettik ekologııa ınspektory Gúljaınar Ábdrahmanova. 

Bıyl «Qazaqstan ǵarysh sapary» AQ-y alǵashqy eki túsirilimniń qujatyn jiberdi. Qazir oblys aýmaǵynda 108 qoqys alańy tabyldy. Onyń ishinde Aqtóbe qalasynyń Astana aýdanynda 23, Almaty aýdanynda 52, Alǵa aýdanynda 21, Mártókte 12 ýchaske tirkeldi. Baqylaý qyrkúıek aıynyń sońyna deıin jalǵasady. 

— Ǵaryshtan túsirilgende 50 shaqyrym aýmaqty qamtıdy. Oǵan Aqtóbe qalasy tolyq kirip tur. Sonymen birge Mártók, Hromtaý, Qarǵaly, Alǵa aýdandarynyń aýmaǵy ilikti, — dedi Gúljaınar Ábdrahmanova.

Aqtóbe oblystyq PD JPQB qazirgi kezde qoqysty kimniń laqtyryp ketkenin anyqtaý úshin izdeý jumysyn júrgizip jatyr. Ákimshilik quqyqbuzýshylyq týraly kodekstiń 505-babyna sáıkes 20 AEK kóleminde aıyppul salynady. 

— Jyl basynan beri 4 myńnan astam ákimshilik quqyqbuzýshylyq anyqtalyp, adamdar jaýapqa tartyldy. Kóbi qala turǵyndary. Arasynda kásipkerler de bar, — dedi Aqtóbe oblystyq PD JPQB tabıǵatty qorǵaý tobynyń aǵa ınspektory Serik Eleýov.

Eske salsaq, Aqtóbede óndiristik qaldyq ta bar. Elek ózenin lastaıtyn Alǵa hımııa zaýyty qaldyǵynyń qashan joıylary belgisiz.