«Aqtóbeniń» áıelder arasyndaǵy Chempıondar lıgasynda qarsylastary anyqtaldy
ASTANA. KAZINFORM - Shveıtsarııanyń Non qalasynda áıelder arasyndaǵy UEFA Chempıondar lıgasy 2026/27 maýsymynyń ekinshi irikteý kezeńine jerebe tartý rásimi ótti.
Jerebe qorytyndysy boıynsha Qazaqstan chempıony atanǵan «Aqtóbe» áıelder komandasy shaǵyn týrnırdiń 3-tobynda baq synaıdy. Aqtóbelik klýbtyń qarsylastary - «Dınamo Mınsk» (Belarýs), «Breıdablık» (Islandııa), «Servett» (Shveıtsarııa).
Tórt komandanyń biri shaǵyn týrnırdi óz alańynda qabyldaıdy. Týrnırdiń jartylaı fınaldyq kezdesýleri 5 tamyzda, al fınal men úshinshi oryn úshin matchtar 8 tamyzda ótedi.
«Aqtóbe» 5 tamyzda Islandııanyń «Breıdablık» klýbymen oınaıdy, ony jeńgen jaǵdaıda «Dınamo Mınsk» pen «Servett» jubynyń jeńimpazymen kezdesedi.
Top jeńimpazy Chempıondar joly arqyly áıelder arasyndaǵy Chempıondar lıgasynyń úshinshi irikteý kezeńine joldama alady. Ekinshi oryn alǵan komanda áıelder arasyndaǵy Eýropa kýbogynyń ekinshi irikteý kezeńinde oıyn kórsetse, úshinshi oryn ıegeri atalǵan týrnırdiń birinshi irikteý kezeńine túsedi.
Jalpy alǵanda, 19 komanda jarysty alǵashqy irikteý kezeńinen bastaıdy. Ol matchtar 22 jáne 25 shildede ótedi. Al ekinshi irikteý kezeńinde bes jeńimpazǵa qosymsha 39 klýb qosylyp, kezdesýler 5 jáne 8 tamyz kúnderine josparlanǵan.
Eske salsaq, budan buryn fýtboldan 2026/2027 jylǵy maýsymdaǵy UEFA Chempıondar lıgasy ekinshi irikteý kezeńindegi almatylyq «Qaırattyń» yqtımal qarsylasy anyqtaldy.
