Aqtóbeniń aýdandarynda qoqys polıgony nege salynbaı jatyr
AQTÓBE. KAZINFORM – Polıgon salýǵa kem degende 600-700 mln teńge qajet. Bul bıýdjetke úlken salmaq bolyp tur.
Aqtóbe oblysynda 15 orynǵa ǵana polıgon statýsy berilgen. Olar Aqtóbe qalasynda jáne Alǵa, Hromtaý, Shalqar, Mártók, Qobda, Baıǵanın men Temir aýdandarynda ornalasqan. Aqtóbe oblystyq Tabıǵı resýrstardy retteý jáne tabıǵatty paıdalanýdy retteý basqarmasynyń habarlaýynsha, onyń 8-i kommýnaldyq, bireýi jeke menshik jáne altaýy vahtalyq kentterdi qamtamasyz etetin jáne turǵyndardan qatty turmystyq qatty qaldyq qabyldaıtyn jer qoınaýyn paıdalanýshylar polıgony. Al ózge eldimekenderde qaldyq kómýge arnalǵan oryndar bekitilgenimen, arnaıy statýsy joq.
- Polıgon qurylysy qymbatqa túsedi. Aýdan ortalyqtarynyń jobasyna 600-700 mln teńge qajet. Sondyqtan Ekologııa mınıstrliginde shaǵyn eldimekenderge polıgon salý talaptaryn ońtaılandyrý jumysy júrip jatyr. Aýdan ortalyqtarynan bólek eldimekender de bar. Olarǵa da polıgon kerek. Talap ózgergen soń joba jasalyp, salynady degen jospar quryp otyrmyz, - dedi Aqtóbe oblystyq Tabıǵı resýrstardy retteý jáne tabıǵatty paıdalanýdy retteý basqarmasynyń basshysy Isataı Espaǵanbetov.
Aıta keteıik, Aqtóbede eldimekenderdiń bes paıyzynda ǵana zańdastyrylǵan qoqys polıgony bar. Badamsha, Shubarqudyq, Yrǵyz, Oıyl, T.Júrgenov, Qarabutaq aýyldaryna jańa polıgon salý úshin joba ázirlenip jatyr.
