Aqtóbeniń 30 aýylynda halyq sany elýge de jetpeıdi
AQTÓBE. KAZINFORM — Soǵan qaramastan turǵyndardy jappaı kóshirý nemese aýyldy taratý jospary joq. Jergilikti ákimdik shaǵyn aýyldardy tirek eldi mekenderge bekitken. Bul týraly Kazinform saýalyna Aqtóbe oblysynyń ekonomıka jáne bıýdjettik josparlaý basqarmasy jaýap berdi.
Ulttyq statıstıka bıýrosynyń málimetine súıensek, qazirgi kezde oblys halqynyń sany 960 myńǵa jýyqtady. Onyń 733 myńnan astamy, ıaǵnı 76,5% qalada turady. Al aýyl turǵyndarynyń sany — 225 myń adam (23,5%).
2025 jyly oblysta halyq sany 50 adamnan az 30 aýyl tirkelgen. Aýyldy taratpaı ustap turý úshin tirek aýyldarǵa bekitti.
— Aýyldyq eldi mekenderdiń demografııalyq jáne áleýmettik-ekonomıkalyq jaǵdaıyna monıtorıng júrgiziledi. Halyq sany az eldi mekenderdiń damý perspektıvalary olardyń demografııalyq ahýaly, áleýmettik jáne ınjenerlik ınfraqurylymmen qamtamasyz etilýi, ekonomıkalyq belsendiligi, kólik qoljetimdiligi jáne basqa da faktorlardy eskerile otyryp qarastyrylady. Qazirgi ýaqytta atalǵan eldi mekenderdiń turǵyndaryn jappaı kóshirý nemese olardy taratý jóninde bekitilgen jospar joq. Áleýmettik qyzmetterdiń qoljetimdiligi jaqyn ornalasqan tirek, shekara mańy aýyldyq eldi mekenderdiń áleýetin paıdalaný arqyly qamtamasyz etiledi. Jalpy oblysta júrgizilip jatqan memlekettik saıasat aýyldyq eldi mekenderdi taratýǵa emes, aýyldyq aýmaqtardyń áleýetin tıimdi paıdalanýǵa, tirek eldi mekenderdi damytýǵa jáne aýyl turǵyndarynyń ómir súrý sapasyn arttyrýǵa baǵyttalǵan, — dep habarlady Aqtóbe oblysynyń ekonomıka jáne bıýdjettik josparlaý basqarmasy.
Taǵy bir derek, oblysta 400-den astam mektep bolsa, onda 194 myń bala bilim alady. Bilim ordasynyń teń jartysyna jýyǵy shaǵyn jınaqty mektep. 2024 jyly munda 13 700 bala oqydy (2022 jyly — 14,5 myń oqýshy, 2023 jyly 13,8 myń oqýshy — red.). Mektepterdi saqtap qalý úshin byltyr 61 aýylǵa 115 otbasy qaladan qonys aýdaryp, baspanamen qamtyldy.
