Aqtóbeniń 3 aýdanynda qar erip, úılerdi sý aldy

AQTÓBE. KAZINFORM - Aqtóbeniń Muǵaljar, Temir, Baıǵanın aýdandarynda qar sýynyń aǵyny kúsheıip, birneshe úıge sý kirdi.

Aqtóbe oblysy Muǵaljar aýdanynyń ákimi Darhan Ermaǵambetovtiń aıtýynsha, búgin tústen keıin Embi qalasynyń bir kóshesi arqyly sý aqqan. Aǵys qatty bolyp, birneshe úıge sý kirdi. Saldarynan joldy jyrýǵa týra keldi.

- Altyndy-Embi baǵytyndaǵy jol jyryldy. Qazir sý saıǵa aǵyp jatyr,- dep habarlady aýdan ákimi Darhan Ermaǵanbetov.

Sonymen birge Baıǵanın aýdanynyń ortalyǵy Qaraýylkeldi aýylynyń Báıishev, Baraq batyr kósheleri boıynda úılerdiń aýlalaryna sý kirdi.

- Sý tasqynyna qarsy jumystarǵa 15 tehnıka 150 adam jumyldyrylyp jatyr. Úılerge sý kirgen-kirmegeni áli anyqtalǵan joq, - dep habarlady Aqtóbe oblysy ákiminiń baspasóz qyzmeti.

Aýyl turǵyny Samat Áldenovtiń aıtýynsha, dala jaqtan sý kóp kele bastaǵanda jol jyrý jumysy kesh júrgizilgen. Bul jaǵdaı byltyr da boldy.

- Byltyr sýǵa ketti úıim. Maǵan shyǵyn retinde 300 myń teńge berdi. Al men bir bólmeni jóndeýge 350 myń teńge jumsadym. Bıyl da jaǵdaı qaıtalandy. Erte qımyldap, joldy jyrǵanda mundaı bolmas edi,- dedi aýyl turǵyny Samat Áldenov.

Sondaı-aq Temir aýdanynyń ortalyǵy Shubarqudyqta kósheni sý basty. 

- Kereev kóshesiniń sýaǵary «Elmurat» dúkeniniń qasynda ornalasqan. Alaıda aǵys kúsheıip, sý tez jınala bastady. Sondyqtan Zadepo aımaǵynda ornalasqan shlıýz jabylyp, sý aǵysyn Qazaqaýyl aımaǵynda jasalǵan sýaǵarǵa buryp jatyrmyz. Turǵyn úılerdi sý basý qaýipi joq. Másele aýdan basshylyǵynyń baqylaýynda, - dep aqparat taratty Temir aýdanynyń ákimdigi.