Aqtóbeniń joldarynda beınekameralar kóbeıedi
AQTÓBE. QazAqparat - «Qaýipsiz qala» jobasynyń aıasynda Aqtóbeniń qoǵamdyq oryndarynda kezeń-kezeńimen 800-den astam beınekameralar ornatý kózdelip otyr. Bul týraly oblystyq ІІD-niń Jergilikti polıtsııa qyzmetiniń basshysy Qanybek Jaqsyǵalıev málim etti, dep habarlaıdy QazAqparat.
Sondaı-aq, kóshe qıylystary men joldyń jelilik ýchaskelerinde jol erejesin buzǵandardy avtomatty túrde tirkeıtin 38 kamera ornatylmaq.
«Búgingi tańda oblys ortalyǵynda Aqtóbe qalasy ІІB Jedel basqarý ortalyǵyna tikeleı jalǵanǵan 208 vıdeokamera bar. Hromtaý qalasynda 27 vıdeokamera jumys istep tur, olardyń kómegimen byltyr 97 qylmys ashylyp, 19 myń ákimshilik quqyqbuzýshylyq anyqtaldy», - dedi Qanybek Jaqsyǵalıev.
Aqtóbe ákimdigi «SmartCity Aktobe» memlekettik-jekeshelik seriktestik jobasy aıasynda 260 beınekamera ornatylatyn 147 kópqabatty úıdiń alańy anyqtalǵan. Jyldyń sońyna deıin Aqtóbedegi kireberisterge 2,5 myńnan astam kamera ornatý josparlanýda.
Sondaı-aq, vıdeobaqylaý júıesi oblystaǵy birqatar aýdan ortalyqtarynda da paıda bolady. Alǵa, Qandyaǵash, Shalqar qalalary úshin jobalyq-smetalyq qujattama ázirlengen. Bul jerlerde jańa mamandandyrylǵan Jedel basqarý ortalyqtary salynǵan.
