Aqtóbeniń úzdik stýdentteri oblys ákiminiń arnaýly stıpendııasyn aldy

Oqýda úzdik, qoǵamdyq jumystarǵa, mádenı jáne sporttyq sharalarǵa belsene qatysyp júrgen jastar búgin 80-160 myń teńge kóleminde stıpendııa aldy. Aqyly oqý oryndarynyń stýdentteri úshin bul úlken qoldaý, ata-anaǵa kómek.

«Ózim kópbalaly otbasynyń qyzymyn. Al balanyń tuńǵyshymyn, menen keıingi ini-sińlilerim mektepte bilim alady. Anam bala kútimimen úıde, otbasynda tek ákemiz jumys isteıdi. Sondyqtan arnaýly stıpendııa biz úshin kómek, qoldaý boldy. Ózim oqýdy aıaqtaǵan soń mektepte muǵalim bolýdy armandaımyn. Úıde kishkentaılardyń bárin ózim oqytyp, sabaqtaryn baqylaımyn», - dedi Aqtóbe gýmanıtarlyq kolledjiniń 2-kýrs stýdenti Janar Orynbava.

Al Aqilgek Myrzabaı Marat Ospanov atyndaǵy Batys Qazaqstan memlekettik medıtsınalyq ýnıversıtetinde bilim alady. Bolashaq stomatolog aldymen medıtsınalyq kolledjdi bitirip, jumys istegen. Keıin ýnıversıtette bilimin jetildirýdi jón sanady.

«Ýnıversıtette oqý aqysy 700 myń teńge. Oqý úlgerimim jaqsy, qoǵamdyq jumystarǵa belsendi aralasqan soń stıpendııa maǵan buıyrdy. Ata-anam Baıǵanın aýdany, Bulaqtykól aýylynda turady», - dedi stýdent Aqilgek Myrzabaı.

Jastarmen kezdesýge oblys ákimi Ońdasyn Orazalın qatysyp, óńirde jas ǵalymdardyń artqanyn atap ótti.

«Elbasynyń tapsyrmasymen Jastar jyly dep jarııalanyp, jumys atqarylyp jatyr. Jastardyń bastamasyn qoldaý maqsatynda stıpendııa taǵaıyndalǵan bolatyn. Jastar belsendi, sol úshin alǵys aıtamyz. Negizi bıyl joǵary oqý oryndarynan 200-ge jýyq, arnaýly orta oqý oryndarynan 100-ge jýyq jumys tústi. Jastar arasynda ǵylymmen, kásippen aınalysýdy jón kórgenderi de bar», - dedi óńir basshysy Ońdasyn Orazalın.

JOO-nyń - 137, arnaýly orta oqý ornynyń 40 stýdenti búgin stıpendııa aldy. Olardy irikteýge qoǵamdyq uıymdar da qatysty.