Aqtóbeniń úsh aýylynda feldsherlik-akýsherlik beket ashyldy

Aqtóbe qalasynyń Maǵadjan, Aqshat jáne Qobda aýdanynyń Terisaqqan aýylynda feldsherlik-akýsherlik beket, al Qobda aýdanynyń Bestaý aýylynda medıtsınalyq beket ashyldy. Astana qalasynyń 20 jyldyǵyna oraı ashylǵan medıtsınalyq mekeme Aqshat aýylynyń 800 turǵynyna em kórsetedi.

«Aýyl kún sanap ósip, jańa medıtsınalyq mekemege qajettilik artty. Jańa feldsherlik-akýsherlik bekette qajetti jabdyqtardyń bári bar. Munda jalpy tájirıbeli dáriger, medbıke, sanıtar maman bolady. Aldaǵy ýaqytta dárigerlerdiń sany artyp, aýyl turǵyndaryna em júrgizý aýqymy keńeıedi. Kúndizgi statsıonarda birneshe kereýet bar. Ekpe alyp, dárigerdiń turaqty baqylaýynda bolýdy qalaıtyn naýqastarǵa jaǵdaı jasaldy»,- dedi oblystyq densaýlyq saqtaý basqarmasynyń basshysy Áset Qalıev.

Qalanyń Maǵadjan aýylynda da jaıly feldsherlik-akýsherlik beket ashyldy. Zamanaýı medıtsına beketi naýqastar úshin jaıly. Beket ishinde kardıogrammaǵa túsip, qan tapsyryp, adam boıyndaǵy qant quramyn tekserýge bolady.

«Maǵadjan aýylyndaǵy medtsınalyq mekemede Zarechnyı-1, 2, 3 eldimekenderiniń turǵyndary alǵashqy kómek ala alady. Sonymen qatar, júkti áıelder esepke alynyp, únemi baqylaýda bolady. Balalarǵa ekpe jasatýǵa da múmkindik bar. Gınekologııalyq kabıneti tolyq jabdyqtalǵan. Aldaǵy ýaqytta shaǵyn medıtsınalyq mekemeler men kópsalaly emhanalardy baılanystyryp, onlaın rejımde keńes berý qarastyrylady. Bul naýqasqa dál jáne tez dıagnoz qoıýǵa múmkindik beredi»,- dep habarlady oblystyq densaýlyq saqtaý basqarmasynyń baspasóz qyzmeti.

Aýyl turǵyndar buryn bir bólme ishinde barlyq emdi qabyldasa, endi olar ár dárigerdiń óz kabınetine baryp, dertine daýa izdeıdi.

«Bir bólmede ot jaǵady, sol jerde em júrgizdi. Al jańa medıtsınalyq beket óte keń, jaıly. Únemi dáriger baqylaýynda otyrǵan adamdar úshin jaılylyq qarastyrylǵan»,- dedi aýyl turǵyny Botagóz Qurmanbaeva.