Aqtóbeniń turaqtandyrý qoryna jetkizilgen kartoptyń shirigi kóp bolyp shyqty

AQTÓBE. QazAqparat – Aqtóbe oblysynyń turaqtandyrý qoryna Pavlodardan jetkizilgen kartoptyń bir bóligi shirip ketken. Muny qor qoımasyna jasalǵan press-týr barysynda jýrnalıster toby baıqap qaldy. Jaýaptylar máseleniń mán-jaıyn túsindirdi, dep habarlaıdy QazAqparat tilshisi.

2018-2022 jyldar aralyǵynda turaqtandyrý qoryna áleýmettik mańyzy bar taýarlardy saqtaý úshin bıýdjetten 2,2 mlrd teńge aqsha bólindi. Bul jumysty turaqtandyrý qorynyń operatory – «Aqtóbe» ÁKK atqarady. Bıyl 2 309 tonna kartop, 269 tonna pııaz, 260 tonna sábiz jáne 46 tonna qyryqqabat satyp alynady. Kókóniske 388 mln teńge jumsalady.

«Qoımadaǵy kartoptyń kelisimsharty 2021 jyly jasalǵan. Ol jerde baǵa 62 teńgeden 162 teńgege deıingi aıyrmashylyqta. Bul – satyp alý baǵasy. Al naryqqa shyǵarý úshin biz taldap, talqylaımyz. Statıstıkaǵa súıenemiz. Statıstıka málimeti aptasyna bir ret shyǵady. Sodan 10-15 paıyz tómen satamyz, ıaǵnı taýar qymbattap ketse, erteń-aq satýǵa qoıamyz. «Tabys» kommýnaldyq bazarynda orta eseppen kartoptyń kelisi 100-135 teńgeden bar. Qazir ınterventsııa jasaıtyn bolsaq, ózimizdiń kartop ótpeı qalýy múmkin. Sondyqtan, bıyl ákelinip jatqan kartop áleýmettik dúkenge de shyqqan joq», - dedi seriktestik basshysy Erlan Blıev.

Press-týr barysynda qaptardy ashyp kórgen jýrnalıster kartoptyń shirip ketkenin baıqady. Málim etilgenindeı, Aqtóbemen kelisimshart jasaǵan pavlodarlyq seriktestiktiń kartoby áli tekserilmegen. Qoımaǵa jetkizilgenimen, qoǵamdyq baqylaýdan ótpepti. Eger qordaǵy ónimniń 10 paıyzdan astamy búlingen bolsa, tıisti sharalar qabyldanady.

«Búlingen kartopty qoǵamdyq keńes múshelerimen, aýyl sharýashylyǵy basqarmasy, áleýmettik-kásipkerlik korporatsııasy birge qaraımyz. Sapasy tómen bolsa, qaptyń ishindegi shirigen kartop 10 paıyzdan assa ónimdi qaıta almastyrady nemese aqshasyn qaıtarady. Ol jaqtan 55 tonna kartop ákelindi. Jaǵdaıy ortasha. Pavlodarlyq kompanııamen aradaǵy kelisimshart byltyr jasalǵan. Olar myń tonnasyn tasymaldaýy tıis. Bir bóligi jetkizildi. Áli kebýi kerek, sosyn qaıta irikteýden ótedi. Jetkizý, tıeý, túsirý bárin sol óndirýshi kompanııa mindetine alady. Shirip ketse, qaıtaramyz», - dedi Erlan Blıev.

Oblystyq turaqtandyrý qoryna áleýmettik mańyzy bar taýar alý úshin bıyl 1 mlrd 153 mln teńge bólindi. Tizimde 7 224 tonnasy birinshi surypty bıdaı uny, 434 tonnasy qant, 40 tonna qaraqumyq, 40 tonna kúrish, 100 myń lıtr kúnbaǵys maıy bar. Turaqtandyrý qoryna saqtalǵan taýar «Tabys» kommýnaldyq bazary jáne shaǵyn kommýnaldyq bazarlarda satylady.

Eske salsaq, byltyr Aqtóbedegi turaqtandyrý qorynda saqtalǵan kartop shirip ketip, kópshiliktiń narazylyǵyn týdyrǵan edi.